ജീന്‍സ് ഇടുന്ന പെണ്‍കുട്ടികള്‍ ഗര്‍ഭിണികള്‍ ആകില്ല എന്ന കണ്ടെത്തലുമായി രജത് കുമാര്‍ ; ഇത്തവണ കൂവാന്‍ ആളില്ലാത്തത് കൊണ്ട് രക്ഷപ്പെട്ടു
ലോകത്ത് ഏറ്റവും കൂടുതല്‍ പ്രശ്‌നങ്ങള്‍ നടക്കുവാന്‍ കാരണം എന്താണ് എന്ന് കേട്ടാല്‍ നമ്മുടെ നാട്ടിലെ ചിലര്‍ പറയുന്ന ഉത്തരം പെണ്‍കുട്ടികള്‍ ജീന്‍സ് ഇടുന്നത് കൊണ്ടാണ് എന്നാകും. ജാതിമതഭേദമന്യേ ഒരുമാതിരി എല്ലാ മേഖലകളിലും ഉള്ളവര്‍ കൈയ്യില്‍ മൈക്ക് കിട്ടിയാല്‍ ഈ വിഷയം പറയാതെ പോകില്ല. ഈ വിഷയത്തില്‍ ഏറ്റവും കൂടുതല്‍ റിസര്‍ച്ച് നടത്തുന്ന വ്യക്തിയാണ് മൂല്യബോധന ജാഥയുടെ ക്യാപ്റ്റനും സ്റ്റുഡന്റ്സ് കേഡറ്റ് പരിശീലകനുമായ ഡോ : രജത് കുമാര്‍. മനസിലായില്ലേ വര്‍ഷങ്ങള്‍ക്ക് മുന്‍പ് തിരുവനന്തപുരം വിമന്‍സ് കോളേജില്‍ കടുത്ത സ്ത്രീ വിരുദ്ധത പ്രസംഗിച്ചതിന്റെ പേരില്‍ ആര്യ എന്ന പെണ്‍കുട്ടി കൂവിയോടിച്ച അതേ രജത് കുമാര്‍ തന്നെ. താനടക്കമുള്ള ആണ്‍കുട്ടികള്‍ ഒന്ന് മനസ്സ് വെച്ചാല്‍ പെണ്‍കുട്ടികള്‍ പത്ത് മാസം വീട്ടിലിരിക്കേണ്ടി വരും എന്നതടക്കമുള്ള കാര്യങ്ങളാണ് അന്ന്, അദ്ധേഹം തട്ടിവിട്ടത്.
കൂവല്‍ കിട്ടിയിട്ടും തന്റെ ജീന്‍സ് വിരുദ്ധത ലോകം അറിഞ്ഞിട്ടും ആ വിഷയം കൈവിടാന്‍ ഇദ്ദേഹം തയ്യാറായിട്ടില്ല ഇതുവരെ. ഇത്തവണ പ്രവാസി കൂട്ടായ്മ സംഘടിപ്പിച്ച മുസ്ലീം സമ്മേളനത്തിലാണ് ജീന്‍സ് ധരിക്കുന്ന പെണ്‍കുട്ടികള്‍ ഗര്‍ഭിണികളാവില്ല എന്ന വാദം ഇദ്ദേഹം അവതരിപ്പിച്ചത്. പെണ്‍കുട്ടികള്‍ ടൈറ്റ് ജീന്‍സ് വാങ്ങിച്ച് ഇട്ടുകൊടുക്കുമ്പൊ ഓവേറിയന്‍ ഫോളിക്കിളുകള്‍ ഡാമേജാകുമെന്ന പരമ വിഡ്ഢിത്തം ഇദ്ദേഹം പറയുന്നു. എന്നാല്‍ യഥാര്‍ഥത്തില്‍ ജീന്‍സ് ധരിക്കുന്നതുകൊണ്ട് സ്ത്രീകളുടെ അണ്ഡാശയത്തിനു പ്രത്യേകിച്ച് പ്രശ്‌നമൊന്നും വരുന്നില്ലെന്നതാണ് വാസ്തവം. തുടര്‍ന്ന് പറയുന്നത് ശ്രദ്ധിച്ചേ, ‘ ഈ പെണ്‍കുട്ടികളെ കല്യാണം കഴിക്കുന്ന നല്ലൊരു പയ്യന് കുഞ്ഞുങ്ങളുണ്ടാകുന്നില്ല ‘. എന്നും ഇദ്ദേഹം കണ്ടെത്തിക്കഴിഞ്ഞു. സത്യത്തില്‍ ഇറുക്കമുള്ള വസ്ത്രം ധരിച്ചാല്‍ പുരുഷന്മാരിലെ ബീജോല്പാദനം കുറയാനിടയുണ്ട് എന്നതാണ് ശാസ്ത്രം പറയുന്നത്.
പുരുഷന്മാരുടെ പ്രത്യുല്പാദനാവയവങ്ങള്‍ സ്ത്രീകളെ അപേക്ഷിച്ച് നോക്കിയാല്‍ എളുപ്പം അപകടത്തില്‍ പെടാനിടയുള്ള രീതിയിലാണ് സജ്ജീകരണവും. സ്ത്രീകളുടെ യൂട്രസും അണ്ഡാശയവും പെല്‍വിസ് അഥവാ ഇടുപ്പിനുള്ളില്‍ ഭദ്രമായിരിക്കുമ്പോള്‍ പുരുഷന്മാരുടേത് ഒരു തൊലിയുടെ മാത്രം സംരക്ഷണയില്‍ ശരീരത്തിനു പുറത്താണു സ്ഥിതിചെയ്യുന്നത്. കളിക്കുമ്പൊ ഒരു ഫുട്‌ബോളോ ക്രിക്കറ്റ് ബോളോ വന്ന് കൊണ്ടിട്ടുള്ള ആണ്‍കുട്ടികള്‍ക്കും മുതിര്‍ന്നവര്‍ക്കുമറിയാവുന്നതാണ് അക്കാര്യം. പുരുഷവേഷം കെട്ടിയ സ്ത്രീ പ്രസവിക്കുന്ന കുഞ്ഞിന് എന്ത് സ്വഭാവമായിരിക്കും? ആ കുഞ്ഞിന് പറയുന്ന പേരാണ് ട്രാന്‍സ് ജെന്‍ഡറുകള്‍ , നപുംസകം. അപ്പൊ ഇന്നത്തെ തലമുറയില്‍ കാണുന്ന പല കഥാപാത്രങ്ങളുടെയും അടുത്ത തലമുറ മക്കള്‍ വരാന്‍ ഞാന്‍ കാത്തിരിക്കും ‘ എന്നും ഇദ്ദേഹം പറയുന്നു.
