ഗോവ ജയിച്ചു ; ഐഎസ്എസ് നാലാം സീസണില്‍ സെമി കാണാതെ കേരള ബ്ലാസ്റ്റേഴ്സ് പുറത്ത്
ഗോവയുടെ ജയത്തിനു പിന്നാലെ ഐഎസ്എസ് നാലാം സീസണില്‍ സെമി കാണാതെ കേരള ബ്ലാസ്റ്റേഴ്സ് പുറത്ത്. ഗോവയിലെ ജവഹര്‍ ലാല്‍ നെഹ്‌റു സ്‌റ്റേഡിയത്തില്‍ നടന്ന ഗോവ-കൊല്‍ക്കത്ത മത്സരത്തില്‍ ഗോവ വിജയം പിടിച്ചെടുത്തതോടെയാണ്‌ ബ്ലാസ്‌റ്റേഴ്‌സിന്‍റെ സെമി മോഹങ്ങള്‍ അസ്തമിച്ചത്. സെമി ഉറപ്പിക്കാന്‍ ഗോവയ്ക്ക് ഏറെ നിര്‍ണായകമായ മത്സരത്തില്‍ ഒന്നിനെതിരെ അഞ്ചു ഗോളുകള്‍ക്കാണ് കൊല്‍ക്കത്തയ്‌ക്കെതിരെ ആതിഥേയരുടെ വിജയം. ഇനി ബെംഗളൂരുവിനെതിരെ നടക്കാനിരിക്കുന്ന അവസാന മത്സരത്തില്‍ വിജയിച്ചാലും ബ്ലാസ്റ്റേഴ്സിന് സെമിയിലെത്താന്‍ സാധിക്കില്ല.
തോല്‍വിയോടെ ഒരു മത്സരം മാത്രം ശേഷിക്കുന്ന കൊല്‍ക്കത്ത 13 പോയന്റോടെ ഒമ്പതാം സ്ഥാനത്താണ്‌. വിജയത്തോടെ ഗോവ ഒരു മത്സരം ശേഷിക്കെ 27 പോയന്റോടെ പട്ടികയില്‍ നാലാം സ്ഥാനത്തേക്ക് മുന്നേറി. അവസാന നാലിലെത്താന്‍ ഇനി ഗോവയം ജംഷേദ്പുരും തമ്മിലാണ് മത്സരം. ഇരുവരും നേര്‍ക്കുനേര്‍ വരുന്ന അവസാന മത്സരത്തില്‍ വിജയിക്കുന്നവര്‍ നാലാം സ്ഥാനത്തോടെ സെമിയിലേക്ക് മുന്നേറും, മത്സരം സമനിലയില്‍ കലാശിച്ചാല്‍ ഗോവ സെമിയിലെത്തും.
