ഇന്ന് മുതല്‍ 7 അല്ല, 8 ആണ്; സംസ്ഥാനത്ത് ബസ് ചാര്‍ജ് വര്‍ധന ഇന്ന് മുതല്‍
തിരുവനന്തപുരം: സംസ്ഥാനത്ത് ബസ് ചാര്‍ജ് വര്‍ധന ഇന്ന് മുതല്‍ പ്രാബല്യത്തില്‍ വരും. ഓര്‍ഡിനറിയില്‍ മിനിമം ചാര്‍ജ് 7-ല്‍നിന്ന് 8 രൂപയായും കിലോമീറ്റര്‍ നിരക്ക് 64 പൈസയില്‍ നിന്ന് 70 പൈസയായും ഉയരും. ഫാസ്റ്റ് പാസഞ്ചറിന്റെ മിനിമം ചാര്‍ജ് 11 രൂപയും കിലോമീറ്റര്‍ നിരക്ക് 75 പൈസയുമായും സൂപ്പര്‍ ഫാസ്റ്റിന്റേത് യഥാക്രമം 15 രൂപയും 78 പൈസയുമായും കൂടും.
ജന്റം ലോ ഫ്‌ളോര്‍ നോണ്‍ എസി ബസുകളുടെ മിനിമം നിരക്ക് എട്ടില്‍ നിന്നും രണ്ടു രൂപ കൂട്ടി 10 രൂപയാക്കി ഉയര്‍ത്തി. കിലോമീറ്റര്‍ ചാര്‍ജ് 70 പൈസയില്‍നിന്ന് 80 ആക്കി ഉയര്‍ത്തി. ലോ ഫ്‌ളോര്‍ എസി ബസുകളുടെ മിനിമം നിരക്ക് 20 രൂപയാക്കി. 15 രൂപയ്ക്കു മുകളിലുള്ള ടിക്കറ്റിന് സെസ് കൂടി ഈടാക്കുന്നതിനാല്‍ 21 രൂപ നല്‍കേണ്ടി വരും. കിലോമീറ്റര്‍ നിരക്ക് 1.50 രൂപയായി തുടരും. സ്‌കാനിയ- വോള്‍വാ ബസുകളുടെ മിനിമം ചാര്‍ജ് 80 രൂപയും കിലോമീറ്റര്‍ നിരക്ക് രണ്ടു രൂപയും ആക്കി.
