സിഫ്‌നിക്കറിയാമായിരുന്നു ബ്ലാസ്റ്റേഴ്സ് സെമി കടക്കില്ലെന്ന് അതുകൊണ്ടവന്‍ ഗോവയിലെത്തി; സെമിയിലുമെത്തി; ബ്ലാസ്റ്റേഴ്സിനെ പരിഹസിച്ച് മറ്റ് ക്ലബുകളുടെ ആരാധകര്‍
ഐഎസ്എസ് നാലാം സീസണില്‍ സെമി കാണാതെ കേരള ബ്ലാസ്റ്റേഴ്സ് പുറത്ത്. ബംഗളൂരുമായി ബ്ലാസ്റ്റേഴ്സിന് ഒരു മത്സരം കൂടി ബാക്കി നില്‍ക്കെയാണ് ബ്ലാസ്റ്റേഴ്സ് പുറത്താകുന്നത്.ശരിക്കും പറഞ്ഞാല്‍ ഗോവയില്‍ ഇന്നലെ നടന്ന ഗോവ-കൊല്‍ക്കത്ത മത്സരത്തില്‍ 5-1-ന് ഗോവ വിജയം പിടിച്ചെടുത്തതോടെയാണ് ബ്ലാസ്റ്റേഴ്സിന് പുറത്തേക്കുള്ള വഴി തുറന്നത്. ഇന്ന് ബെംഗളൂരുവിനെതിരെ നടക്കാനിരിക്കുന്ന അവസാന മത്സരത്തില്‍ വിജയിച്ചാലും ബ്ലാസ്റ്റേഴ്സിന് ഇനി സെമിയിലെത്താന്‍ സാധിക്കില്ല.
ഗോവയുടെ വിജയം ബ്ലാസ്റ്റേഴ്സിന്റെ സെമി സാധ്യതകളടച്ചപ്പോള്‍ ബ്ലാസ്റ്റേഴ്സ് ആരാധകര്‍ മെക്കിട്ടു കേറുന്നത് ഗോവയ്ക്കായി അഞ്ചാമത്തെ ഗോള്‍ കണ്ടെത്തി ഈ സീസണില്‍ ബ്ലാസ്റ്റേഴ്സിനൊപ്പമുണ്ടായിരുന്ന സിഫ്നിയോസിനോടാണ്. സീസണില്‍ ആദ്യ ഘട്ടത്തില്‍ ബ്ലാസ്റ്റേഴ്സിനൊപ്പമുണ്ടായിരുന്ന സിഫ്നിയോസ് പാതിവഴിയില്‍ ബ്ലാസ്റ്റേഴ്സ് വിട്ട് ഗോവയിലേക്ക് ചേക്കേറുകയായിരുന്നു.
അതേസമയം ഐഎസ്എല്ലില്‍ ഏറ്റവും കൂടുതല്‍ ആരാധകരുള്ള ബ്ലാസ്റ്റേഴ്സിനെ പരിഹസിച്ചുകൊണ്ട് മറ്റ് ക്ലബ്ബുകളുടെ ആരാധകരും രംഗത്തെത്തിയിട്ടുണ്ട്. സിഫ്നിയോസിന് ബ്ലാസ്റ്റേഴ്സ് പുറത്താകുമെന്ന് അറിയാമായിരുന്നുവെന്നും അതുകൊണ്ടാണ് ക്ലബ് ഉപേക്ഷിച്ച് ഗോവയിലെത്തിയതെന്നുംചിലവിരുതന്‍മാര്‍ പരിഹസിച്ചു.
