കപ്പോ ഇല്ല, സൂപ്പര്‍ കപ്പില്‍ ഇടം പിടിക്കാന്‍ ഇന്നെങ്കിലും കലിപ്പാകുമോ കേരള ബ്ലാസ്റ്റേഴ്സ്
ഐ എസ് എല്ലില്‍ സെമി കാണാതെ പുറത്തായ കേരള ബ്ലാസ്റ്റേഴ്സ് ബംഗളൂരുവിന്റെ മണ്ണില്‍ ഇന്നിറങ്ങുന്നത് അഭിമാന പോരാട്ടത്തിനാണ്. കൊച്ചിയില്‍ വന്ന് മൂന്ന് ഗോളിന് തങ്ങളെ പരാജയപ്പെടുത്തിയ ബെംഗളൂരുവിനെ അവരുടെ മണ്ണില്‍ പരാജയപ്പെടുത്താനുറച്ചാണ് ബ്ലാസ്റ്റേഴ്സ് എത്തിയിരിക്കുന്നത്. ഐ എസ് എല്‍ സീസണില്‍ കേരള ബ്ലാസ്റ്റേഴ്‌സിന്റെ അവസാന ലീഗ് മത്സരം കൂടിയാണിത്. ഇന്നത്തെ മത്സരം ജയിച്ചാല്‍ കേരളം ബ്ലാസ്റ്റേഴ്സിന് സൂപ്പര്‍ കപ്പിന് നേരിട്ട് യോഗ്യത നേടാനാവും.
മറുവശത്ത് ലീഗില്‍ ഒന്നാം സ്ഥാനത്തുള്ള ബെംഗളൂരു എഫ് സി മികച്ച ഫോമിലാണ്. ഈ സീസണില്‍ ആദ്യ ഐ എസ് എല്‍ കളിക്കുന്ന ബെംഗളൂരു എഫ് സി ആദ്യമായി ലീഗില്‍ സെമി ഉറപ്പിച്ച ടീമും കൂടിയാണ്. കഴിഞ്ഞ ഏഴ് മത്സരങ്ങളില്‍ പരാജയമറിയാതെ കുതിക്കുന്ന ബെംഗളൂരു എഫ് സിക്ക് കേരള ബ്ലാസ്റ്റേഴ്സിന് കടുത്ത വെല്ലുവിളിയാണ്. ഫെബ്രുവരി മാസത്തില്‍ ഏഴു മത്സരങ്ങള്‍ കളിച്ച ബെംഗളൂരു ചില താരങ്ങള്‍ക്ക് വിശ്രമം നല്‍കിയാവും ഇന്ന് ഇറങ്ങുക.
17 മത്സരങ്ങളില്‍ നിന്നായി ബെംഗളൂരു എഫ് സി 37 പോയിന്റോടെ ഒന്നാം സ്ഥാനത്താണ്. 17 മത്സരങ്ങള്‍ കളിച്ച കേരള ബ്ലാസ്റ്റേഴ്സ് 25 പോയിന്റുമായി ആറാം സ്ഥാനത്താണ്.
