കൊച്ചുമകളുടെ സെല്‍ഫിക്ക് പോസ് ചെയ്യുന്നതിനിടെ അമ്മുമ്മ കിണറ്റില്‍ വീണു; വീണ്ടുമൊരു സെല്‍ഫി ദുരന്തം -വീഡിയോ വൈറല്‍
കൊച്ചുമകളുടെ സെല്‍ഫിക്ക് പോസ് ചെയ്യുന്നതിനിടെ അമ്മുമ്മ സംരക്ഷണ മതിലില്ലാത്ത കിണറ്റില്‍ വീണു. ആലപ്പുഴയിലാണ് സംഭവം. രണ്ട് ആണ്‍കുട്ടികള്‍ കിണറിനടുത്ത് കളിക്കുന്നതും ഇതില്‍ മൂത്ത കുട്ടി ഇതെല്ലാം വീഡിയോയില്‍ പകര്‍ത്തുകയും ചെയ്യുകയായിരുന്നു. ഇതിനിടെ ആള്‍മറയില്ലാത്ത കിണറ്റില്‍ നിന്ന് വെള്ളം കോരുകയായിരുന്നു ഇവരുടെ അമ്മമ്മ. കുട്ടികള്‍ കിണറിനടുത്തേക്ക് വന്നപ്പോള്‍ സംരക്ഷണ വേലിയിലാത്ത കിണറിന്റെ സമീപത്തു നിന്ന് മാറി പോകാന്‍ ഇവര്‍ കുട്ടികളെ ശാസിക്കുന്നതും വീഡിയോയിലുണ്ട്.
അല്‍പ്പസമയത്തിന് ശേഷം മൂത്ത കുട്ടി സെല്‍ഫിയെടുക്കാന്‍ നോക്കുമ്പോഴായിരുന്നു അമ്മമ്മ കിണറ്റില്‍ വീണത്. ഇതും വീഡിയോയില്‍ കാണാം. കിണറ്റിലേക്ക് വീഴുന്ന സ്ത്രീ അലറിക്കരയുകയും ഇത് കേട്ട് കുട്ടികള്‍ കരയുന്നതും കേള്‍ക്കാം. മൂത്ത കുട്ടി അച്ഛനെ വിളിച്ചുകൊണ്ടുവരാമെന്ന് പറഞ്ഞ് ഓടിപോവുകയും ചെയ്യുന്നത് വരെ വീഡിയോയില്‍ കേള്‍ക്കാം.
അതേസമയം സ്ത്രീ നിസാരപരിക്കുകളോടെ രക്ഷപ്പെട്ടതായാണ് വിവരം. കഴിഞ്ഞ ദിവസമാണ് സംഭവം നടന്നത്. സംഭവത്തിന്റെ വീഡിയോ ഇതിനോടകം വൈറലായി കഴിഞ്ഞു.
