ബോളിവുഡിലെ ചില മുന്‍നിര നടന്മാര്‍ കാസ്റ്റിങ് കൗച്ച് ആവശ്യപ്പെടുന്നവര്‍ : ഇല്യാന ഡിക്രൂസ്
മുംബൈ : ഇന്ത്യന്‍ സിനിമയിലെ കാസ്റ്റിങ് കൗച്ചിനെ പറ്റി തുറന്നു പറഞ്ഞു നടി ഇല്യാന ഡിക്രൂസ്. ബോളിവുഡിലെ മുന്‍നിര നടന്മാരില്‍ ചിലര്‍ ആ കൂട്ടത്തില്‍ ഉള്‍പ്പെട്ടവരാണ് എന്നും എന്നാല്‍ സിനിമാമോഹവുമായി നടക്കുന്ന പെണ്‍കുട്ടികള്‍ വായ തുറക്കില്ലെന്ന് ഇല്യാന പറയുന്നു. ഒരു ദേശീയ മാധ്യമത്തിന് നല്‍കിയ അഭിമുഖത്തിലാണ് ഇല്യാന കാസ്റ്റിങ് കൗച്ചിനെ പറ്റി തുറന്നു പറഞ്ഞത്. കാസ്റ്റിങ് കൗച്ചിനെക്കുറിച്ച് ബോളിവുഡ് നടിമാര്‍ സംസാരിക്കാന്‍ ഭയക്കുന്നതിന് ഒരുപാട് കാരണങ്ങളുണ്ടെന്ന് ഇല്ല്യാന പറയുന്നു. നടന്മാരെ ദൈവങ്ങളെപ്പോലെ ആരാധിക്കുന്ന രാജ്യമാണ് ഇന്ത്യ എന്നും നടന്മാര്‍ക്ക് എതിരെ ആരെങ്കിലും വായ തുറന്നാല്‍ ആരാധകര്‍ അവരെ വളഞ്ഞിട്ട് ആക്രമിക്കും. ഭീഷണിപ്പെടുത്തും. പിന്നെ അവരുടെ കരിയറും അവസാനിക്കുമെന്നും ഇല്യാന പറയുന്നു.
കൈയില്‍ എണ്ണാവുന്ന ബോളിവുഡ് നടികള്‍ മാത്രമേ തങ്ങള്‍ക്ക് ഉണ്ടായ കാസ്റ്റിങ് കൗച്ച് അനുഭവങ്ങള്‍ പങ്കുവച്ചിട്ടുള്ളൂ. പക്ഷേ അതില്‍ ചൂഷണം ചെയ്തവരുടെ പേരുകള്‍ വെളിപ്പെടുത്തിയവര്‍ വിരളമാണ്. ലൈംഗിക പീഡനത്തെ അതിജീവിച്ച ഒരുപാട് നടിമാരുള്ള ഒരിടമാണ് സിനിമ എന്നതില്‍ യാതൊരു സംശയവും വേണ്ട എന്നും ഇല്യാന പറയുന്നു. തമിഴ് തെലുങ്ക് ചിത്രങ്ങളിലൂടെ സിനിമയില്‍ സജീവമായ ഇല്യാന ഇപ്പോള്‍ മുഖ്യമായും ബോളിവുഡ് സിനിമകളില്‍ മാത്രമാണ് അഭിനയിച്ചു വരുന്നത്.
