ഐഎസ്എല്ലിലെ ഈ അപൂര്‍വ്വ നേട്ടം സ്വന്തമാക്കി മലയാളി താരം മുഹമ്മദ് റാഫി
ഐഎസ്എല്ലിലെ നാലാം സീസണില്‍ ചെന്നൈയിന്‍ എഫ്സി ഫൈനലില്‍ കടന്നതോടെ ഇന്ത്യന്‍ ഫുട്ബോളിലെ അപൂര്‍വ റേക്ക്ഡ് നേടിയിരിക്കുകയാണ് മലയാളി താരം മുഹമ്മദ് റാഫി. ഐഎസ്എല്ലില്‍ ഏറ്റവും അധികം ഫൈനല്‍ കളിക്കുന്ന താരമെന്ന അപൂര്‍വ്വ നേട്ടമാണ് റാഫിയെ തേടിയെത്തിയിരിക്കുന്നത്.
ഇന്നലെ നടന്ന രണ്ടാം സെമിയില്‍ എഫ്സി ഗോവയെ മൂന്നു ഗോളുകള്‍ക്ക് തകര്‍ത്ത് ചെന്നൈയിന്‍ എഫ്സി ഫൈനലില്‍ കടന്നതോടെയാണ് റാഫിയ്ക്ക് ഈ അപൂര്‍വ്വ നേട്ടം സ്വന്തമായത്. മൂന്ന് ടീമുകളുടെ ഭാഗമായി ഫൈനലില്‍ കളിച്ച താരം എന്നതാണ് റാഫിയുടെ ഈ നേട്ടത്തിലെ ഹൈലൈറ്റ്.
ആദ്യ സീസണില്‍ കൊല്‍ക്കത്തയ്ക്കു വേണ്ടി കളിച്ച റാഫി ഫൈനലിലെത്തുകയും കേരള ബ്ലാസ്റ്റേഴ്സിനെ തോല്‍പിച്ച് കൊല്‍ക്കത്തയ്‌ക്കൊപ്പം കിരീടത്തില്‍ മുത്തമിടുകയും ചെയ്തിരുന്നു. മൂന്നാം സീസണില്‍ കേരളത്തിനായി റാഫി ഫൈനല്‍ കളിച്ചു ഗോളും നേടി. എന്നാല്‍ തോല്‍വി ഏറ്റുവാങ്ങി.
നാലാം സീസണില്‍ 30 ലക്ഷം രൂപയ്ക്കാണ് റാഫി ചെന്നൈയിന്‍ എഫ്സിയിലെത്തിയത്. ചെന്നൈയ്ക്കായി രണ്ട് ഗോളും ഈ ഫുട്ബോള്‍ താരം നേടിയിരുന്നു. എഫ്സി ഗോവയെ ഇരുപാദങ്ങിലുമായി 4-1ന് തകര്‍ത്താണ് ചെന്നൈയിന്‍ എഫ്സി ഫൈനലിലേക്ക് കുതിച്ചത്.
പ്രതിഭയുടെ നല്ല നാളുകള്‍ കഴിഞ്ഞെങ്കിലും ഇന്ത്യന്‍ ഫുട്ബോളിലെ ഒരേയൊരു ഭാഗ്യതാരം എന്ന നേട്ടമാണ് റാഫി സ്വന്തമാക്കിയിരിക്കുന്നത്.
