കളിക്കളത്തില്‍ കൊഹ്‌ലി കോമാളി എന്ന് ദക്ഷിണാഫ്രിക്കന്‍ താരം;സോഷ്യല്‍ മീഡിയയില്‍ പൊങ്കാലയിട്ട് ആരാധകര്‍
ദക്ഷിണാഫ്രിക്കന്‍ ബോളര്‍ കഗിസോ റബാഡയുടെ തീ തുപ്പുന്ന പന്തുകള്‍ പലപ്പോഴും ബാറ്റ്സ്മാന്‍മാരെ വെള്ളം കുടിപ്പിക്കാറുണ്ട്. കളത്തില്‍ അഗ്രസീവായ റബാഡ ചിലപ്പോള്‍ നിയന്ത്രണം വിട്ട് പെരുമാറുമുണ്ട്.
ഇത്തരത്തില്‍ ഓസീസിനെതിരായ മത്സരത്തില്‍ മോശമായി പെരുമാറിയ റബാഡയെ ഐസിസി രണ്ട് മത്സരങ്ങളില്‍ നിന്നും വിലക്കിയിരുന്നു. എന്നാല്‍ ഐസിസിയുടെ ഈ തീരുമാനം പലതരത്തിലുള്ള വിമര്‍ശനങ്ങള്‍ക്ക് വിധേയമായിരുന്നു. കളിക്കാരില്‍ ചിലര്‍ തന്നെ രംഗത്തെത്തുകയും ചെയ്തു.
ദക്ഷിണാഫ്രിക്കന്‍ താരം പോള്‍ ഹാരിസന്റെ പ്രതികരണമാണ് ഇപ്പോള്‍ ക്രിക്കറ്റ്‌ലോകത്തെ ചൂട്പിടിപ്പിച്ചിരിക്കുന്നത്. ട്വിറ്ററിലൂടെ ഇന്ത്യന്‍ നായകന്‍ വിരാട് കോഹ്ലിയെ പേരെടുത്ത് പരാമര്‍ശിച്ച പോള്‍ ഹാരിസിന്റെ ട്വീറ്റ് പുതിയവിവാദത്തിന് തിരികൊളുത്തിയിരിക്കുന്നത്.
ഇന്ത്യയും ദക്ഷിണാഫ്രിക്കയും തമ്മിലുള്ള പര്യടനത്തില്‍ ഇന്ത്യന്‍ നായകന്‍ വിരാട് കോഹ്ലി കളിക്കളത്തില്‍ പെരുമാറിയ രീതി എടുത്ത് പറഞ്ഞായിരുന്നു ഹാരിസിന്റെ ട്വീറ്റ്. കോഹ്ലി കളിക്കളത്തില്‍ കോമാളിയെ പോലെയാണ് പെരുമാറിയതെന്നും പക്ഷെ ഐസിസി താരത്തിനെതിരെ ഒരു നടപടിയുമെടുത്തില്ലെന്ന് ഹാരിസ് വിമര്‍ശിച്ചു.
ഇത് കോഹ് ലി ആരാധകരെ ചൊടിപ്പിച്ചു. താരത്തിന്റെ ട്വിറ്റര്‍ പേജില്‍പൊങ്കാലയുമായി നിറഞ്ഞിരിക്കുകയാണ് ആരാധകര്‍.
