ചാത്തന്നൂരില്‍ വാഹനാപകടത്തില്‍ ഒരു കുടുംബത്തിലെ മൂന്നുപേര്‍ മരിച്ചു
ചാത്തന്നൂരില്‍ കെ എസ് ആര്‍ ടി സി സൂപ്പര്‍ ഫാസ്റ്റ് ബസും സ്‌കൂട്ടറും കൂട്ടിയിടിച്ചു ഉണ്ടായ അപകടത്തില്‍ ഒരുകുടുംബത്തിലെ മൂന്നുപേര്‍ മരിച്ചു. ഉച്ചയ്ക്ക് രണ്ടരയോടെ സ്റ്റാന്‍ഡേഡ് ജങ്ഷനില്‍ വച്ചായിരുന്നു അപകടം. സ്‌കൂട്ടര്‍ യാത്രക്കാരായ ചാത്തന്നൂര്‍ ഏറം കൊല്ലന്റഴികത്ത് ഷിബു(47), ഭാര്യ സിജി(40), മകന്‍ ആദിത്യന്‍(11) എന്നിവരാണ് മരിച്ചത്. ഇവര്‍ക്കൊപ്പമുണ്ടായിരുന്ന മറ്റൊരു മകന്‍ ആദര്‍ശ് നിസാര പരിക്കുകളോടെ രക്ഷപ്പെട്ടു.
അപകടത്തിപ്പെട്ട മൂവരെയും ഉടനെ ആശുപത്രിയില്‍ പ്രവേശിപ്പിച്ചെങ്കിലും രക്ഷിക്കാനായില്ല. ഇന്നലെ രാവിലെയാണ് ഷിബു ഗള്‍ഫില്‍ നിന്നും നാട്ടില്‍ എത്തിയത്. തുടര്‍ന്ന്‍ ഭാര്യയെയും മക്കളായ ആദിത്യനെയും ആദിഷിനെ(ഏഴ്)യും കൂട്ടി ബൈക്കിൽ ആദിച്ചനല്ലൂരിലുള്ള സഹോദരിയുടെ വീട്ടിലേക്കു പോകുകയായിരുന്നു. ബസിടിച്ചു നിലത്തുവീണ മൂന്നു പേരുടെയും തലയിലൂടെ സൂപ്പർ ഫാസ്റ്റ് ബസിന്റെ ചക്രങ്ങള്‍ കയറിയിറങ്ങുകയായിരുന്നു.
