കടല്‍വെള്ളം ശുദ്ധീകരിച്ച് ലിറ്ററിന് 5 പൈസ നിരക്കില്‍ നല്‍കുന്ന പദ്ധതി ഉടന്‍ പ്രാബല്യത്തില്‍: കേന്ദ്ര മന്ത്രി ഗഡ്കരി
ഭോപ്പാല്‍: കടല്‍ജലം ശുദ്ധീകരിച്ച് ലിറ്ററിന് അഞ്ചു പൈസ നിരക്കില്‍ കുടിവെള്ളം ലഭ്യമാക്കുന്ന പദ്ധതിക്കു ഉടന്‍ തുടക്കമാകുമെന്ന് കേന്ദ്ര ജലവിഭവ, നദീവികസന, മന്ത്രി നിതിന്‍ ഗഡ്കരി. തമിഴ്‌നാട്ടിലെ തൂത്തുക്കുടിയില്‍ ഇതിനു വേണ്ട പരീക്ഷണങ്ങള്‍ നടന്നുവരികയാണെന്ന് ബന്ദ്രാബനില്‍ രണ്ടു ദിവസത്തെ നദി മഹോത്സവം ഉദ്ഘാടനം ചെയ്ത് സംസാരിക്കവെ മന്ത്രി വ്യകതമാക്കി.
രാജ്യത്തെ നദികളുടെ ശോചനീയ അവസ്ഥയെക്കുറിച്ച് ആശങ്ക പ്രകടിപ്പിച്ച മന്ത്രി ജലസംരക്ഷണത്തിനും മറ്റും മധ്യപ്രദേശ് സര്‍ക്കാര്‍ സ്വീകരിക്കുന്ന നടപടികള്‍ പ്രശംസിച്ചു. നാഗ്പൂരില്‍ മലിന ജലം ശുദ്ധീകരിച്ച് താപനിലയങ്ങള്‍ക്കു നല്‍കുന്ന പദ്ധതി അദ്ദേഹം പ്രസംഗത്തില്‍ എടുത്തുപറഞ്ഞു. നഗരങ്ങളിലെ മലിനജലം ശുദ്ധീകരിച്ചു താപനിലയങ്ങള്‍, വ്യവസായങ്ങള്‍, റെയില്‍വേ തുടങ്ങിയവയ്ക്ക് നല്‍കി ധനസമാഹരണം നടത്താന്‍ നദീവികസന മന്ത്രാലയത്തിനു പദ്ധതിയുണ്ടെന്നും ഗഡ്കരി വെളിപ്പെടുത്തി.
സംസ്ഥാനങ്ങള്‍ക്കിടയില്‍ നദീജലത്തിനുള്ള തര്‍ക്കങ്ങളുടെ ചര്‍ച്ചകള്‍ക്കിടെ പാക്കിസ്ഥാനിലേക്ക് നദീജലം ഒഴുകുന്നതിനെക്കുറിച്ച് ആര്‍ക്കും ഉത്കണ്ഠയില്ലാത്തത് ദൗര്‍ഭാഗ്യകരമാണെന്നും ഗഡ്കരി അഭിപ്രായപ്പെട്ടു. ഇന്ത്യയും പാക്കിസ്ഥാനും ആറു നദികളാണ് പങ്കിടുന്നത്.
പാക്കിസ്ഥാനിലേക്ക് ഇന്ത്യയിലെ മൂന്നു നദികളിലെ ജലം ഒഴുകുന്നുണ്ട്. എന്നാല്‍ ഒരു ദിനപത്രവും ഇതേക്കുറിച്ച് എഴുതാറില്ല. ഒരു എംഎല്‍എ പോലും ഇത് നിര്‍ത്തണമെന്ന് ആവശ്യപ്പെടാറുമില്ല – ഗഡ്കരി പറഞ്ഞു.
