കണ്ണൂരില്‍ വൃദ്ധയെ ചെറുമകള്‍ മര്‍ദിച്ച സംഭവം ; പോലീസ് കേസ് രജിസ്റ്റര്‍ ചെയ്തു
കണ്ണൂര്‍ : കണ്ണൂര്‍ ആയിക്കരയില്‍ വൃദ്ധക്ക് മര്‍ദനം ഏറ്റ സംഭവത്തില്‍ പോലീസ് കേസ് രജിസ്റ്റര്‍ ചെയ്തു. ഉപ്പാലവളപ്പില്‍ ദീപയ്‌ക്കെതിരെയാണ് കണ്ണൂര്‍ സിറ്റി പോലീസ് കേസ് രജിസ്റ്റര്‍ ചെയ്തത്. മുത്തശ്ശിയായ കല്യാണിയെയാണ് ദീപ ക്രൂരമായി മര്‍ദിചത്. ദീപയുടെ അമ്മ ജാനകിയുടെ അമ്മയാണ് കല്യാണി. കല്യാണിയും ദീപയും ദീപയുടെ അമ്മ ജാനകി എന്നിങ്ങനെ മൂന്നുപേരാണ് ഈ വീട്ടില്‍ താമസിക്കുന്നത്.
ഇവര്‍ മൂന്നുപേര്‍ക്കും മാനസിക അസ്വാസ്ഥ്യമുള്ളതായി റിപ്പോര്‍ട്ടുകളുണ്ട്. പോലീസും ആരോഗ്യവകുപ്പ് അധികൃതരും ഇവരുടെ വീട്ടില്‍ എത്തിയിട്ടുണ്ട്. കല്യാണിയെ വൈദ്യപരിശോധനയ്ക്ക് വിധേയയാക്കും. പിന്നീട് ഭക്ഷണവും വസ്ത്രവും നല്‍കിയ ശേഷം വൃദ്ധസദനത്തിലേക്ക് മാറ്റുമെന്നു പറയുന്നു. ദീപയെയും വൈദ്യപരിശോധനയ്ക്ക് വിധേയയാക്കാനാണ് പോലീസ് തീരുമാനം.
