ആരാധകരുടെ ആ കാത്തിരിപ്പിന് വിരാമം; അനസ് എടത്തൊടികയെ സ്വന്തമാക്കി ബ്ലാസ്റ്റേഴ്സ്
കോഴിക്കോട്: കേരള ബ്ലാസ്റ്റേഴ്സിന്റെ ഡിഫന്‍സ് നിരയിലേക്ക് ഇന്ത്യന്‍ ഫുടബോളിലെ മലയാളി പ്രതിരോധ താരം അനസ് എടത്തൊടികയെ എത്തിച്ച് ബ്ലാസ്റ്റേഴ്സ് മാനേജ്‌മെന്റ്. രണ്ടു വര്‍ഷത്തേക്കാണ് കരാര്‍. എന്നാല്‍ കരാര്‍ തുക പറുത്തുവന്നിട്ടില്ല.
കേരള ബ്ലാസ്റ്റേഴ്സില്‍ കളിക്കുക എന്നത് അനസും, ബ്ലാസ്റ്റേഴ്സ് ആരാധകരും ഒരുപോലെ സ്വപ്നം കണ്ടിരുന്നതാണ്. ആ സ്വപ്നം സഫലമായതിന്റെ സന്തോഷത്തിലാണ് അനസും ആരാധകരും. അനസ് കൂടി എത്തുന്നതോടെ സന്ദേശ് ജിങ്കനടങ്ങിയ ബ്ലാസ്റ്റേഴ്സിന്റെ പ്രതിരോധനിരയുടെ ശക്തി കൂടും.
കഴിഞ്ഞ സീസണില്‍ റെക്കോഡ് തുകയ്ക്ക് ഡ്രാഫ്റ്റിലൂടെയാണ് ജെംഷദ്പുര്‍ എഫ്.സി അനസിനെ സ്വന്തമാക്കിയത്. എന്നാല്‍ പരിക്ക് കാരണം ഭൂരിഭാഗം മത്സരങ്ങളിലും പ്രതിരോധതാരത്തിന് പുറത്തിരിക്കേണ്ടി വന്നു. നിലവില്‍ സൂപ്പര്‍ കപ്പിനായി ഭുവനേശ്വറിലാണ് അനസുള്ളത്. സൂപ്പര്‍ കപ്പിന് ശേഷമാകും താരം ബ്ലാസ്റ്റേഴ്സില്‍ ചേരുക. ഐ.എസ്.എല്ലില്‍ ആദ്യ രണ്ടു സീസണില്‍ ഡല്‍ഹി ഡൈനാമോസിന് വേണ്ടിയാണ് അനസ് ബൂട്ടുകെട്ടിയത്.
