ബ്ലാസ്റ്റേഴ്‌സും പുറത്തായി ; സൂപ്പര്‍ കപ്പില്‍ കേരളത്തിന്റെ പ്രതീക്ഷകള്‍ അസ്തമിച്ചു
സൂപ്പര്‍കപ്പ് ഫുട്‌ബോളില്‍ കേരളത്തിന്റെ പ്രതീക്ഷകള്‍ അസ്തമിച്ചു. മത്സരത്തില്‍ നിന്നും കേരളത്തിന്റെ പ്രതീക്ഷയായ കേരളാ ബ്ലാസ്റ്റേഴ്സ് പുറത്തായി. പ്രീ ക്വാര്‍ട്ടറില്‍ ഐ.എസ്.എല്‍ ടീമായ നറോക്ക എഫ്.സിയുമായി രണ്ടുഗോളിന് മുന്നിട്ടുനിന്നതിന് ശേഷമായിരുന്നു ബ്ലാസ്റ്റേഴ്സ് തോല്‍വി വഴങ്ങിയത്. 11-ാം മിനിറ്റില്‍ പെനാല്‍റ്റിയിലൂടെ പുള്‍ഗയും 49-ാം മിനിറ്റില്‍ മലയാളി താരം പ്രശാന്തുമാണ് ബ്ലാസ്റ്റേഴ്സിന്റെ ഗോളുകള്‍ നേടിയത്.
അവസാന മിനിറ്റില്‍ അലസരായി കളിച്ച ബ്ലാസ്റ്റേഴ്സിന്റെ പിഴവുകള്‍ മുതലെടുത്ത് 70,79,82 മിനിറ്റുകളിലാണ് നറോക്ക എഫ്.സി ഗോളുകള്‍ നേടിയത്. 82-ാം മിനിറ്റില്‍ ബ്ലാസ്റ്റേഴ്സ് ക്യാപ്റ്റന്റെ പിഴവാണ് നറോക്കയുടെ വിജയ ഗോളിന് വഴിയൊരുക്കിയത്. നേരത്തെ ഗോകുലം എഫ്.സിയും മത്സരത്തില്‍ നിന്നും പുറത്തായിരുന്നു.
