സഞ്ജുവിന്റെ വെടികെട്ടിനു മുന്‍പില്‍ മുട്ടുമടക്കി കോഹ്ലിയും സംഘവും
മലയാളി താരം സഞ്ജു വി സാംസന്റെ വിഷു ആഘോഷത്തിനു മുന്‍പില്‍ മുട്ടുമടക്കി കോഹ്ലിയും സംഘവും. ഐ.പി.എല്‍. പതിനൊന്നാം സീസണില്‍ റോയല്‍ ചാലഞ്ചേഴ്‌സിനെതിരേ രാജസ്ഥാന്‍ റോയല്‍സിന് ജയം. മലയാളി താരം സഞ്ജു സാംസണ്‍ തകര്‍ത്താടി മത്സരത്തില്‍ 19 റണ്‍സിനാണ് രാജസ്ഥാന്‍ ജയിച്ചത്. സീസണില്‍ ഇത് രാജസ്ഥാന്റെ രണ്ടാം ജയമാണ്. മലയാളി താരം സഞ്ജു സാംസണിന്റെ ബാറ്റിങ്ങ് മികവില്‍ നിശ്ചിത 20 ഓവറില്‍ നാല് വിക്കറ്റ് നഷ്ടത്തില്‍ രാജസ്ഥാന്‍ 217 എന്ന കൂറ്റന്‍ സ്‌കോറില്‍ എത്തുകയായിരുന്നു.
എന്നാല്‍ മറുപടി ബാറ്റിങ്ങിന് ഇറങ്ങിയ കോഹ്ലിക്കും കൂട്ടര്‍ക്കും നിശ്ചിത ഓവറില്‍ 198 റണ്‍സ് നേടുവാനെ കഴിഞ്ഞുള്ളൂ. 45 പന്തുകള്‍ നേരിട്ട് 92 റണ്‍സ് നേടിയ സഞ്ജു പുറത്താകെ നിന്നു. രണ്ട് ബൗണ്ടറികളും പത്ത് കൂറ്റന്‍ സിക്സുകളും അടങ്ങിയതാണ് സഞ്ജുവിന്റെ ഇന്നിങ്സ്. മൂന്ന് കളികളില്‍ നിന്നായി 151 റണ്‍സ് നേടിയ സഞ്ജു ശിഖര്‍ ധവാനെ മറികടന്ന് ഓറഞ്ച് ക്യാപും സ്വന്തമാക്കി.
