നാലു ദിവസംകൊണ്ട് 3,000 കുട്ടികളെ കണ്ടെത്താന്‍ ഡല്‍ഹി പോലീസിനെ സഹായിച്ചത്
ന്യൂഡല്‍ഹി : വീടുകളില്‍ നിന്നും കാണാതായ മൂവായിരത്തോളം കുട്ടികളെ നാലു ദിവസംകൊണ്ട് കണ്ടെത്തി ഡല്‍ഹി പോലീസ്. എഫ്.ആര്‍.എസ് എന്ന സോഫ്റ്റ്‌വെയര്‍ ഉപയോഗിചാണ് ഇത്രയും കുട്ടികളെ സ്വന്തം വീട്ടുകാരുടെ അരുകില്‍ എത്തിക്കുവാന്‍ പോലീസിന് കഴിഞ്ഞത്. വിവിധ ബാലഭവനുകളിലുള്ള 45,000 കുട്ടികളില്‍നിന്നാണ് 2,930 കുട്ടികളെ തിരിച്ചറിഞ്ഞ് സ്വന്തം വീടുകളില്‍ തിരികെയെത്തിക്കാനുള്ള അവസരമൊരുങ്ങിയത്. ഫേഷ്യല്‍ റെക്കഗ്നിഷന്‍ സിസ്റ്റം (എഫ്ആര്‍എസ്) എന്ന സോഫ്റ്റ്‌വെയറാണ് ഡെല്‍ഹി പോലീസിന് നാലു ദിവസംകൊണ്ട് ഇത്രയും കുട്ടികളെ തിരിച്ചറിയാന്‍ സഹായകമായത്. പരീക്ഷണാടിസ്ഥാനത്തിലാണ് ഡല്‍ഹി പോലീസ് ഈ സോഫ്റ്റ്‌വെയര്‍ ഉപയോഗിച്ചത്. ഒരു സന്നദ്ധ സംഘടനയുടെ പ്രവര്‍ത്തകനായ ഭുവന്‍ റിബ്ബു എന്നയാളാണ് ഇത്തരമൊരു സോഫ്റ്റ്‌വെയര്‍ വികസിപ്പിക്കുകയും ഡല്‍ഹി പോലീസിന് ഇത് സൗജന്യമായി നല്‍കുകയും ചെയ്തത്.
കാണാതായ കുട്ടികളുടെ ഫോട്ടോയും മറ്റു വിവരങ്ങളും സമാഹരിച്ചിരിക്കുന്ന സോഫ്റ്റ്‌വെയര്‍ ഉപയോഗിച്ച് വിവിധയിടങ്ങളിലെ ബാലഭവനുകളില്‍ പാര്‍പ്പച്ചിരിക്കുന്ന കുട്ടികളുടെ ഫോട്ടോയും വിവരങ്ങളുമായി താരതമ്യം ചെയ്താണ് കുട്ടികളെ തിരിച്ചറിഞ്ഞത്. കാണാതായ കുട്ടികളെ കണ്ടെത്തുന്നതിന് സഹായിക്കുന്ന സോഫ്റ്റ്‌വെയര്‍ പരീക്ഷണാടിസ്ഥാനത്തില്‍ ഉപയോഗിക്കുന്നതിന് ഡല്‍ഹി ഹൈക്കോടതി പോലീസിന് നിര്‍ദേശം നല്‍കിയിരുന്നു. എന്നാല്‍ മന്ത്രാലയത്തില്‍നിന്ന് കുട്ടികളെ സംബന്ധിക്കുന്ന വിവരങ്ങള്‍ ലഭ്യമാകാത്തതിനാല്‍ ഈ സോഫ്റ്റ്‌വെയര്‍ ഉപയോഗിക്കാനാകാത്തതില്‍ കോടതി കടുത്ത അതൃപ്തി പ്രകടിപ്പിച്ചിരുന്നു. തുടര്‍ന്നാണ് വിവിധ കാലങ്ങളിലായി കാണാതായ ഏഴു ലക്ഷത്തോളം കുട്ടികളെ സംബന്ധിക്കുന്ന വിവരങ്ങളും അവരുടെ ഫോട്ടോയും ഡല്‍ഹി പോലീസിന് മന്ത്രാലയം കൈമാറിയത്.
