ആ മരണങ്ങള്‍ എല്ലാം കൊലപാതകങ്ങള്‍ ; സൌമ്യ കൊന്നത് സ്വന്തം മാതാപിതാക്കളെയും കുഞ്ഞുങ്ങളെയും
പിണറായിയില്‍ ഒരു കുടുംബത്തിലെ നാല് പേര്‍ ദുരൂഹസാഹചര്യത്തില്‍ മരിച്ചത് കൊലപാതകം എന്ന് പോലീസ്. സംഭവത്തില്‍ വീട്ടമ്മ സൗമ്യ അറസ്റ്റിലായി. പിണറായി പടന്നക്കരയിലാണ് വര്‍ഷങ്ങള്‍ നീണ്ട ഗൂഢാലോചനയുടെ ഫലമായി ഒരു വീട്ടിലെ നാലുപേര്‍ മരിച്ചത്.പോലീസ് നടത്തിയ ചോദ്യംചെയ്യലില്‍ സൗമ്യ കുറ്റം സമ്മതിച്ചു. മാതാപിതാക്കളുടെയും മക്കളുടെയും മരണം ആസൂത്രിതമായ പരമ്പര കൊലപാതകമാണെന്ന് ഇതോടെ വ്യക്തമായി. എട്ടുവയസുകാരി ഐശ്വര്യയുടെ മൃതദേഹവും പുറത്തെടുത്ത് പരിശോധിച്ച സാഹചര്യത്തിലാണ് കൊലപാതകത്തിന്റെ ചുരുളഴിയുന്നത്. സൗമ്യയുടെ അച്ഛന്‍ കുഞ്ഞിക്കണ്ണന്‍,അമ്മ കമല, എന്നിവരും സൗമ്യയുടെ മക്കളായ ഐശ്വര്യ, കീര്‍ത്തന എന്നിവരുമാണ് ദുരൂഹസാഹചര്യങ്ങളില്‍ മരിച്ചത്.
2012 സെപ്റ്റംബര്‍ ഒമ്പതിനാണ് കീര്‍ത്തന മരിച്ചത്. ആറുവര്‍ഷങ്ങള്‍ക്കു ശേഷം ജനുവരി 31ന് ഐശ്വര്യയും മരിച്ചു. കമല മാര്‍ച്ച് ഏഴിനും കുഞ്ഞിക്കണ്ണന്‍ ഏപ്രില്‍ 13നുമായിരുന്നു മരിച്ചത്. തലശ്ശേരി സഹകരണ ആശുപത്രിയില്‍ ചികിത്സയിലായിരുന്ന സൗമ്യയെ അവിടെനിന്നാണ് പോലീസ് കസ്റ്റഡിയില്‍ എടുത്തത്. വയറ്റിലുണ്ടായ അസ്വസ്ഥതയും ഛര്‍ദിയും കാരണമായിരുന്നു നാലുപേരും വൈദ്യസഹായം തേടിയിരുന്നത്. കീര്‍ത്തനയുടെ മൃതദേഹം പോസ്റ്റ് മോര്‍ട്ടത്തിനു വിധേയമാക്കിയിരുന്നില്ല. എന്നാല്‍ ആ മാര്‍ച്ചില്‍ കമല മരിച്ചപ്പോള്‍ മൃതദേഹ പരിശോധന നടത്തണമെന്ന ആവശ്യമുയര്‍ന്നിരുന്നു. മൃതദേഹ പരിശോധനയ്ക്കു ശേഷമാണ് കമലയുടെ ദേഹം സംസ്‌കരിച്ചത്. എന്നാല്‍ എന്താണ് മരണകാരണമെന്ന് വ്യക്തമായിരുന്നുമില്ല. അതേസമയം എന്താണ് കൊലപാതകങ്ങള്‍ക്ക് പിന്നിലെ കാരണം എന്ന് ഇതുവരെ വ്യക്തമായിട്ടില്ല. സൌമ്യയെ കൂടുതല്‍ ചോദ്യം ചെയ്‌താല്‍ മാത്രമേ ഇതിനുള്ള ഉത്തരങ്ങള്‍ ലഭ്യമാവുകയുള്ളൂ.
