ഐ പി എല്‍ ഒത്തുകളി നടന്നു എന്ന് ആരാധകര്‍
ഐ.പി.എല്‍ പതിനൊന്നാം സീസണ്‍ ഫൈനലിലെ ടീമുകളെ നേരത്തെ തീരുമാനിക്കപ്പെട്ടു എന്ന ആരോപണവുമായി ആരാധകര്‍ രംഗത്ത്. സ്റ്റാറിന്റ െൈലവ് സ്ട്രീമിങ് ആപ്പും വെബ്‌സൈറ്റുമായ ഹോട്ട്‌സ്റ്റാര്‍ സംപ്രേഷണം ചെയ്ത ഐ.പി.എല്‍ ഫൈനലിന്റെ പ്രൊമോ വീഡിയോ തെളിവായി ചൂണ്ടിക്കാട്ടിയാണ് ഐ.പി.എല്ലില്‍ ഒത്തുകളിയെന്ന് റിപ്പോര്‍ട്ട് വന്നത്. പ്രൊമോ വീഡിയോയില്‍ ചെന്നൈ സൂപ്പര്‍ കിങ്‌സിന്റെ എതിരാളിയായി വരുന്നത് കൊല്‍ക്കത്ത നൈറ്റ് റൈഡേഴ്‌സാണ്. കൊല്‍ക്കത്തയും സണ്‍റൈസേഴ്‌സ് ഹൈദരാബാദും തമ്മില്‍ രണ്ടാം ക്വാളിഫയര്‍ വെള്ളിയാഴ്ച്ച നടക്കാനിരിക്കെയാണ് ഈ പ്രൊമോ പുറത്തുവന്നത്. തുടര്‍ന്ന് ഒത്തുകളി ആരോപിച്ച ആരാധകര്‍ ഐ.പി.എല്ലിനെതിരെ രംഗത്തുവരികയായിരുന്നു.
എന്നാല്‍ അതിന്റെ കൂടെത്തന്നെ ചെന്നൈ സൂപ്പര്‍ കിങ്‌സും സണ്‍റൈസേഴ്‌സ് ഹൈദരാബാദും തമ്മിലുള്ള ഫൈനലിന്റെ പ്രൊമോ വീഡിയോയും പുറത്തുവന്നിട്ടുണ്ട്. ഫൈനലിന് മുമ്പ് ഹോട്ട് സ്റ്റാര്‍ രണ്ട് പ്രൊമോ വീഡിയോ തയ്യാറാക്കി വെച്ചതാണെന്നും അതില്‍ ഒരെണ്ണം മാത്രം പുറത്തുവിട്ട് ഐ.പി.എല്ലില്‍ ഒത്തുകളിയുണ്ടെന്ന് പുറത്തായ ടീമുകളുടെ ആരാധകര്‍ ആരോപിക്കുകയാണ് എന്നുമാണ് ചെന്നൈ ആരാധകര്‍ പറയുന്നത്. ഇന്ന് നടക്കുന്ന രണ്ടാം ക്വാളിഫയര്‍ ജയിക്കുന്ന ടീമാകും ഫൈനലില്‍ ചെന്നൈയുടെ എതിരാളികള്‍.
