രാഷ്ട്രപതി ഭവനിലെ മുറിയില്‍ ജീവനക്കാരന്റെ ജീര്‍ണിച്ച മൃതദേഹം
രാഷ്ട്രപതി ഭവന്‍ വളപ്പിലെ മുറിയില്‍നിന്ന് ജീവനക്കാരന്റെ ജീര്‍ണിച്ച മൃതദേഹം കണ്ടെത്തി. രാഷ്ട്രപതിയുടെ ഓഫീസിലെ ജീവനക്കാരനായ ത്രിലോക് ചന്ദിനെയാണ് മരിച്ച നിലയില്‍ കണ്ടെത്തിയത്. മുറിയില്‍ നിന്നും ദുര്‍ഗന്ധം വമിച്ചതിനെ തുടര്‍ന്ന് പരിസരവാസികളാണ് പോലീസില്‍ വിവരമറിയിച്ചത്. പോലീസ് എത്തി മുറിയുടെ വാതില്‍ പൊളിച്ച് നടത്തിയ പരിശോധനയിലാണ് അഴുകിത്തുടങ്ങിയ മൃതദേഹം ലഭിച്ചത്.
ത്രിലോക് ചന്ദ് അസുഖ ബാധിതനായിരുന്നതായി സംശയമുണ്ടെന്നും പോസ്റ്റ്‌മോര്‍ട്ടത്തിനു ശേഷം മാത്രമേ മരണകാരണം വ്യക്തമാകൂ എന്നും പോലീസ് പറഞ്ഞു. അടുത്തിടെയാണ് ഇയാള്‍ ജീവനക്കാര്‍ക്കുള്ള താമസസ്ഥലത്ത് താമസം തുടങ്ങിയത്. മൃതദേഹത്തിന് അഞ്ചു ദിവസത്തോളം പഴക്കമുണ്ടെന്ന് പോലീസ് വ്യക്തമാക്കി. ഹൃദയാഘാതമാകാം മരണകാരണമെന്നാണ് പ്രാഥമിക വിലയിരുത്തല്‍.
