ക്ഷേത്രകുളത്തില്‍ സ്കൂള്‍ വാന്‍ മറിഞ്ഞ് രണ്ടു കുട്ടികളും ആയയും മരിച്ചു ; സംഭവം കൊച്ചിയില്‍
കൊച്ചി കാട്ടിത്തറ റോഡിലെ ക്ഷേത്രക്കുളത്തിലേക്കാണ് സ്കൂള്‍ വാന്‍ മറിഞ്ഞത്. കിഡ്സ് വേള്‍ഡ് എന്ന ഡേ കെയര്‍ സെന്ററിലെ കുട്ടികളുമായി പോയ വാന്‍ ആണ് അപകടത്തില്‍പ്പെട്ടത്. വിദ്യാലക്ഷ്മി, ആദിത്യന്‍ എന്നീ കുട്ടികളും ഡെ കെയര്‍ സെന്ററിലെ ആയ ലതാ ഉണ്ണിയുമാണ് മരിച്ചത്. വാന്‍ ഡ്രൈവര്‍ ഗുരുതര നിലയില്‍ ഐസിയുവിലാണ്. എട്ടു കുട്ടികളും ആയയും ഡ്രൈവറുമാണ് വാനില്‍ ഉണ്ടായിരുന്നതെന്നാണ് വിവരം.
തൃപ്പൂണിത്തുറയിലെ പി.എസ് മിഷന്‍ ആശുപത്രിയിലാണ് മൃതദേഹങ്ങളുള്ളത്. നാട്ടുകാര്‍ ചേര്‍ന്നാണ് രക്ഷാപ്രവര്‍ത്തനം നടത്തിയത്. അതേസമയം അപകടകാരണം അറിവായിട്ടില്ല. മഴപെയ്തത് കൊണ്ട് കുളത്തില്‍ നിറച്ചും വെള്ളം ഉണ്ടായിരുന്നു. റോഡിനോട് ചേര്‍ന്ന നിലയിലാണ് കുളം. ഇവിടെ സംരക്ഷണ ഭിത്തി ഇല്ല എന്നതും അപകടത്തിനു കാരണമായി പറയുന്നു.
