ഗണേഷ്കുമാര് തല്ലിയ യുവാവിന് എതിരെ ജാമ്യമില്ലാ വകുപ്പ് ചുമത്തി കേസെടുത്ത് പോലീസ് ; തല്ലിയ ഗണേഷ് കുമാറിനെതിരെ കേസില്ല
ഗണേഷ് കുമാര്‍ എംഎല്‍എ യുവാവിനെ മര്‍ദ്ദിച്ച സംഭവത്തില്‍ യുവാവിനെതിരെ മാത്രം കേസ് എടുത്ത് കേരളാ പോലീസ് മാതൃകയായി. മര്‍ദ്ദനമേറ്റ യുവാവിനെ പ്രതിയാക്കി ജാമ്യമില്ലാ കേസാണ് പോലീസ് എടുത്തത്. എന്നാല്‍ യുവാവിനെ മര്‍ദിച്ച എംഎല്‍എയുടെ പേരില്‍ ഒരു പെറ്റികേസ് പോലും ഇല്ല. കൊല്ലം അഞ്ചലില്‍ ഒരു മരണവീട്ടില്‍ പോയി മടങ്ങുന്ന വഴിയാണ് കാറിന് സൈഡ് കൊടുത്തില്ലെന്നാരോപിച്ച് ഗണേഷ് കുമാറും ഡ്രൈവറും ചേര്‍ന്ന് യുവാവിനെ ക്രൂരമായി മര്‍ദ്ദിച്ചത്. മരണവീട്ടില്‍ പോയി അമ്മയോടൊപ്പം മടങ്ങി വരികയായിരുന്ന അനന്തകൃഷ്ണല്‍ എന്ന യുവാവിനെയാണ് ഗണേഷ് കുമാറും ഡ്രൈവറും ചേര്‍ന്ന് മര്‍ദ്ദിച്ചത്.
യുവാവിന്റെ കാറിന് പിറകിലായിട്ടാണ് ഗണേഷ് കുമാറിന്റെ കാര്‍ സഞ്ചരിച്ചിരുന്നത്. കാര്‍ പുറകോട്ട് മാറ്റാവോ എന്ന യുവാവിന്റെ അമ്മയുടെ ചോദ്യത്തില്‍ പ്രകോപിതനായ ഗണേഷ്കുമാര് ഉടന്‍ കാറില്‍ നിന്ന് ചാടിയിറങ്ങി മര്‍ദ്ദിക്കുകയായിരുന്നെന്ന് യുവാവ് ആരോപിച്ചു. മര്‍ദ്ദിക്കുന്ന ഗണേഷ്‌കുമാറിനെ തടയാന്‍ യുവാവിന്റെ അമ്മ ശ്രമിച്ചെങ്കിലും താന്‍ ആരാണെന്ന് നിനക്ക് അറിയില്ലെന്ന് ആക്രോശിച്ച് മര്‍ദ്ദനം തുടരുകയായിരുന്നു. അമ്മയെ അസഭ്യവര്‍ഷം പറയുകയും ചെയ്തും.മര്‍ദ്ദനത്തെ തുടര്‍ന്ന് അവശനിലയിലായ യുവാവിനെ ആദ്യം അഞ്ചല്‍ സര്‍ക്കാര്‍ ആശുപത്രിയില്‍ പ്രഥമിക ചികിത്സക്ക് വിധേയനാക്കി. പിന്നീട് വിദഗ്ധ ചികിത്സക്കായി സ്വകാര്യ ആശുപത്രിയിലേക്ക് മാറ്റിയിരുന്നു. പിന്നീടാണ് ഇവര്‍ പോലീസില്‍ പരാതി നല്‍കിയത്.
തനിക്കേറ്റ പരിക്കടക്കം പോലീസ് കാണിച്ച് ബോധ്യപ്പെടുത്തിയ ശേഷമായിരുന്നു യുവാവ് സ്റ്റേഷനില്‍ നിന്ന് മടങ്ങിയത്. എന്നാല്‍ യുവാവിന്റേയും അമ്മയുടേയും പരാതിയില്‍ നടപടിയെടുക്കാന്‍ പോലീസ് തയ്യാറായില്ലെന്ന് മാത്രമല്ല എംഎല്‍എയുടെ ജീവനക്കാരന്‍ നല്‍കിയ പരാതിയില്‍ യുവാവിനെതിരെ ജാമ്യമില്ലാ കേസും രജിസ്റ്റര്‍ ചെയ്തു. കൊല്ലം അഞ്ചല്‍ പോലീസാണ് ജാമ്യം കിട്ടാത്ത വകുപ്പുകള്‍ യുവാവിനും അമ്മയ്ക്കും നേരെ ചുമത്തിയത്.
