യുറുഗ്വായിയുടെ മുന്നില്‍ അടിപതറി റഷ്യ
സൗദിയെയും ഈജിപ്തിനെയും തകര്‍ത്തു വിട്ട റഷ്യ അവസാനം യുറുഗ്വായിയുടെ മുന്നില്‍ അടിപതറി. ലോകകപ്പ് ഫുട്‌ബോളില്‍ സ്വപ്നതുല്ല്യമായ കുതിപ്പ് നടത്തിക്കൊണ്ടിരുന്ന റഷ്യ ഗ്രൂപ്പ് ഘട്ടത്തിലെ അവസാന മത്സരത്തില്‍ യുറഗ്വായോട് നാണംകെട്ട തോല്‍വി ഏറ്റുവാങ്ങുകയായിരുന്നു. മടക്കമില്ലാത്ത മൂന്ന് ഗോളിനായിരുന്നു ആതിഥേയരുടെ തോല്‍വി. ഇതോടെ കളിച്ച മൂന്ന് കളിയും ജയിച്ച് ഒന്‍പത് പോയിന്റായ യുറഗ്വായ് ഗ്രൂപ്പ് ചാമ്പ്യന്മാരായാണ് പ്രീക്വാര്‍ട്ടറില്‍ പ്രവേശിക്കുന്നത്.
ആറ് പോയിന്റുള്ള റഷ്യ രണ്ടാമതാണ്. ശക്തരായ സ്‌പെയിന്‍, പോര്‍ച്ചുഗല്‍, ഇറാന്‍ എന്നിവരില്‍ ആരെങ്കിലുമാവും പ്രക്വാര്‍ട്ടറില്‍ ഇവരുടെ എതിരാളികള്‍. ലൂയിസ് സുവാരസും എഡിന്‍സണ്‍ കവാനിയുമാണ് യുറഗ്വായുടെ സ്‌കോററര്‍മാര്‍. ഒരു ഗോള്‍ റഷ്യയുടെ ഡെന്നിസ് ചെറിഷേവിന്റെ സംഭാവനയാണ്, സെല്‍ഫ് ഗോളിന്റെ രൂപത്തില്‍. മുപ്പത്തിയാറാം മിനിറ്റില്‍ രണ്ടാം മഞ്ഞ കണ്ട് ഇഗോര്‍ സ്‌മോള്‍നിക്കോവ് പുറത്തായതോടെ പത്തു പേരെയും വച്ചാണ് റഷ്യ കളിച്ചത്.
