മരിച്ചവരുടെ പട്ടികയില്‍ പോലും തിലകന്റെ പേരില്ല ; മരണത്തിനു ശേഷം പോലും “അമ്മ” നെറികേട് കാട്ടി എന്ന് ഷമ്മിതിലകന്‍
മരിച്ച ശേഷം പോലും തന്‍റെ അച്ഛനോട് താരസംഘടനയായ അമ്മ നെറികേട് കാട്ടി എന്ന് നടന്‍ ഷമ്മിതിലകന്‍. തന്‍റെ അച്ഛനായ നടന്‍ തിലകനെതിരേ അഭിനേതാക്കളുടെ സംഘടനയായ അമ്മ മുമ്പ് സ്വീകരിച്ച അച്ചടക്ക നടപടി പിന്‍വലിക്കണമെന്നാവശ്യപ്പെട്ട് നടനും തിലകന്റെ മകനുമായ ഷമ്മി തിലകന്‍ അമ്മയ്ക്ക് കത്തയച്ചു. അമ്മയുടെ സുവനീറില്‍ മരിച്ചവരുടെ പട്ടികയില്‍ പോലും തിലകന്റെ പേര് ഉള്‍പ്പെടുത്തിയിട്ടില്ലെന്ന് ഷമ്മി തിലകന്‍ ആരോപിക്കുന്നു.
‘ ജനറല്‍ ബോഡിക്കുള്ള അറിയിപ്പിനൊപ്പം മരണപ്പെട്ടവരുടെ ലിസ്റ്റ് ഉണ്ടാകും. അച്ഛന് മരിച്ച കാലഘട്ടത്തിലേയും എല്ലാവരുടെയും പേര് അതില്‍ ഉണ്ട്. അച്ഛന്റെ മാത്രം ഇല്ല. അച്ഛന് മരിച്ചു എന്നത് സത്യമാണ്. ഞാന്‍ അദ്ദേഹത്തിന് കര്‍മം ചെയ്ത ആളാണ്. അതുകൊണ്ട് ലിസ്റ്റില്‍ പേരില്ല എന്നത് കൊണ്ട് ആ സത്യം സത്യമല്ലാതാകുന്നില്ല. ആ ഒരു വിഷമം ഉണ്ട്. അതുകൊണ്ട് ജനറല്‍ ബോഡിയില്‍ ഞാന്‍ പങ്കെടുക്കാറില്ല’. ഷമ്മി തിലകന്‍ പറഞ്ഞു.
മലയാള സിനിമയുടെ കോടാലിയാണ് സംഘടനയായ ‘അമ്മ’ എന്ന് തിലകന്‍ നടത്തിയ പ്രസ്താവനയാണ് അദ്ദേഹത്തിനെതിരേ കര്‍ശന നടപടിയെടുക്കാന്‍ കാരണമായി അന്ന് ചൂണ്ടിക്കാട്ടിയത്. അതേസമയം അമ്മയുടെ പുതിയ പ്രസിഡന്റ് ആയി തിരഞ്ഞെടുക്കപ്പെട്ട മോഹന്‍ലാലിന്റെ നേതൃത്വത്തിലുള്ള ഭരണസമിതിയില്‍ തനിക്ക് പ്രതീക്ഷയുണ്ടെന്നും ഷമ്മി തിലകന്‍ കത്തില്‍ പറയുന്നു. അച്ഛന് തങ്ങള്‍ മക്കളെക്കാള്‍ വ്യക്തിപരമായ അടുപ്പം ഉണ്ടായിരുന്ന ആളാണ് മോഹന്‍ലാല്‍ അതുകൊണ്ടുതന്നെ ഇക്കാര്യത്തില്‍ പ്രതീക്ഷയുണ്ട് എന്നും ഷമ്മി തിലകന്‍ പറയുന്നു.
