ബ്രസീല്‍ മുന്നോട്ടു തന്നെ ; ആരാധകര്‍ക്ക് ആവേശം
ലോകമെമ്പാടുമുള്ള ആരാധകരെ ആവേശം കൊള്ളിച്ച് മടക്കമില്ലാത്ത രണ്ട് ഗോളിന് മെക്സിക്കോയെ കീഴടക്കിയ ബ്രസീൽ തുടർച്ചയായ ഏഴാം തവണ ലോകകപ്പിന്റെ പ്രീക്വാർട്ടറിൽ പ്രവേശിച്ചു. അമ്പത്തിയൊന്നാം മിനിറ്റിൽ ബ്രസീലിന്‍റെ സൂപ്പര്‍ ഹീറോ നെയ്മറുടെ ഗോളിലാണ് ബ്രസീൽ ലീഡ് നേടിയത്. എൺപത്തിയെട്ടാം മിനിറ്റിൽ നെയ്മറുടെ പാസിൽ പകരക്കാരൻ ഫിർമിനോ ലീഡുയർത്തി.
ആദ്യ നാല്‍പ്പത്തിയഞ്ച് മിനിറ്റില്‍ നെയ്മറും കൂട്ടരും നിരവധി ഗോള്‍ അവസരങ്ങള്‍ സൃഷ്ടിച്ചെങ്കിലും പോസ്റ്റിന് മുന്നില്‍ ഒച്ചോവയുടെ മിന്നല്‍ നീക്കങ്ങളാണ് ഗോള്‍ വഴങ്ങാതെ മെക്സിക്കോയെ രക്ഷിച്ചത്. പന്തടക്കത്തിലും പാസിലും ബ്രസീലിനൊപ്പം പിടിച്ച പ്രകടനമാണ് മെക്‌സിക്കോയും പുറത്തെടുത്തത്.
