കളി മുറുകുന്നു: ജപ്പാനെ വീഴ്ത്തിയ ബല്‍ജിയത്തെ ക്വാര്‍ട്ടറില്‍ ബ്രസീല്‍ നേരിടും…
റോസ്റ്റോവ്: ലോകകപ്പ് ഫുട്ബോള്‍ പ്രീക്വാര്‍ട്ടറില്‍ അവസാനം വരെ പൊരുതിയ ഫിഫ റാങ്കിങ്ങില്‍ 61മത്തെ സ്ഥാനക്കാരായ ജപ്പാനെ മറികടന്ന് ബല്‍ജിയം. രണ്ടിനെതിരെ മൂന്നു ഗോളുകള്‍ക്കാണ് ബല്‍ജിയത്തിന്റെ വിജയം കൈപ്പിടിയിലൊതുക്കിയത്. ജൂലൈ ആറിന് നടക്കുന്ന ക്വാര്‍ട്ടര്‍ പോരാട്ടത്തില്‍ ബ്രസീലും ബല്‍ജിയവുമായി ഏറ്റുമുട്ടും.
ഗോള്‍രഹിതമായ ആദ്യപകുതിക്കു ശേഷം രണ്ടാം പകുതിയിലാണ് മല്‍സരത്തിലെ അഞ്ചു ഗോളുകളും പിറന്നത്. 48ാം മിനിറ്റില്‍ ഹരഗൂച്ചിയും 52ാം മിനിറ്റില്‍ ഇനൂയിയും നേടിയ ഗോളില്‍ മുന്നില്‍ക്കയറിയ ജപ്പാനെ വെര്‍ട്ടോംഗന്‍ (69), മൊറെയ്ന്‍ ഫെല്ലെയ്നി (74), ചാഡ്ലി (90+4) എന്നിവര്‍ നേടിയ ഗോളുകളിലാണ് ബല്‍ജിയം വീഴ്ത്തിയത്. ബല്‍ജിയം പരിശീലകന്‍ പകരക്കാരായി പരീക്ഷിച്ചവരാണ് സമനിലഗോള്‍ നേടിയ ഫെല്ലെയ്നിയും വിജയഗോള്‍ നേടിയ ചാഡ്ലിയും.
ലോകകപ്പ് നോക്കൗട്ട് മല്‍സരങ്ങളില്‍ ഇതുവരെ ജയിക്കാനായിട്ടില്ലെന്ന പേരുദോഷം ബാക്കിവച്ചാണ് റഷ്യയില്‍നിന്നും ജപ്പാന്റെ മടക്കം. 2002ലും 2010ലും ഗ്രൂപ്പുഘട്ടം പിന്നിട്ട ജപ്പാന്‍, അന്നും പ്രീക്വാര്‍ട്ടറില്‍ കീഴടങ്ങി.
