ജലന്ധര് ബിഷപ്പിനെതിരായ ലൈംഗികാരോപണം: കര്ദിനാളിന്റെ മൊഴിയെടുക്കും
കോട്ടയം: ജലന്ധര് ബിഷപ്പിനെതിരായ ബലാത്സംഗ പരാതിയില് കര്ദിനാള് മാര് ജോര്ജ് ആലഞ്ചേരിയുടെ മൊഴിയെടുക്കും. പാലാ ബിഷപ്പ്, കുറവിലങ്ങാട് പള്ളി വികാരി എന്നിവരുടെയും മൊഴിയെടുക്കും. പീഡന വിവരം കര്ദിനാള് ആലഞ്ചേരിയെ നേരത്തെ അറിയിച്ചിരുന്നു. എന്നാല് നടപടികളൊന്നും ഉണ്ടായില്ലെന്ന് കന്യാസ്ത്രീ പറഞ്ഞിരുന്നു. കര്ദിനാളിന് നല്കിയ പരാതിയുടെ പകര്പ്പ് പൊലീസിന് കൈമാറിയിട്ടുണ്ട്.
അതേസമയം, പരാതി അറിയിച്ചിട്ടും കേസില് ഇടപെടാതെ ഒഴിഞ്ഞ് മാറാനാണ് കര്ദിനാള് ആലഞ്ചേരി ശ്രമിച്ചതെന്ന് കന്യാസ്ത്രീയുടെ ബന്ധുവായ ജലന്ധര് വൈദികന് ആരോപിച്ചിരുന്നു. സംഭവം മാര്പ്പാപ്പയെ അറിയിക്കാനുള്ള ബാധ്യത ആലഞ്ചേരിക്ക് ഉണ്ടായിരുന്നുന്നെന്നും വൈദികന് പറഞ്ഞു. കര്ദിനാളിനെ കാണാന് പോയ സമയത്ത് 15 മിനുട്ട് മറ്റ് കന്യാസ്ത്രീകളെ ഒഴിവാക്കി കര്ദിനാള് ആലഞ്ചേരിയുമായി പീഡനത്തിനിരയായ കന്യാസ്ത്രീ സംസാരിച്ചത് എന്താണെന്ന് വെളിപ്പെടുത്തണം. പരാതിയുടെ ഗൗരവം സഭ ഇതുവരെ പരിഗണിച്ചില്ലെന്നും സഭാ അധ്യക്ഷമാര് ആരോപണ വിധേയനായ ബിഷപ്പിനെ പിന്തുണയ്ക്കുന്നെന്നും വൈദികന് ആരോപിച്ചു.
ബിഷപ്പിന്റെ പെരുമാറ്റത്തെക്കുറിച്ച് ഒട്ടേറെ കന്യാസ്ത്രീകള് പരാതി പറഞ്ഞിട്ടുണ്ടെന്നും രാത്രിയില് അശ്ലീല സന്ദേശങ്ങള് അയയ്ക്കുന്നതായി പരാതിയുണ്ടെന്നും വൈദികന് വെളിപ്പെടുത്തി. പരാതികള് പുറത്തു വരാത്തത് അധികാരികളോടുളള പേടിമൂലമാണ്. കുറവിലങ്ങാട്ടെ കന്യാസ്ത്രീയുടെ പരാതി ഒന്പത് വൈദികര്ക്കൊപ്പം രൂപതയില് ഉന്നയിച്ചിരുന്നു. എന്നാല് രൂപതയില് നിന്നോ സഭയില് നിന്നോ നടപടി ഉണ്ടായില്ലെന്നും വൈദികന് പറയുന്നു.
ജലന്ധര് ബിഷപ്പ് ഫ്രാങ്കോ മുളയ്ക്കല് കുറവിലങ്ങാടുള്ള ഗസ്റ്റ് ഹൗസില് രണ്ടുവര്ഷത്തിനിടെ പലതവണ തന്നെ ബലാത്സംഗം ചെയ്തതെന്നാണ് കന്യാസ്ത്രീ പൊലീസിന് മൊഴി നല്കിയത്. 2014 മെയില് ബിഷപ്പ് താമസത്തിനായി ഗസ്റ്റ് ഹൗസിലെത്തിയപ്പോഴാണ് ആദ്യമായി പീഡിപ്പിച്ചത്. തുടര്ന്ന് രണ്ടുവര്ഷത്തിനിടെ 13 തവണ ബലാത്സംഗം ചെയ്തെന്നും കന്യാസ്ത്രീയുടെ മൊഴിയിലുണ്ട്.
ഫ്രാങ്കോ മുളയ്ക്കല് മകളെ ഭീഷണിപ്പെടുത്തിയെന്നു സഭയിലെ മറ്റൊരു കന്യാസ്ത്രീയുടെ പിതാവ് കഴിഞ്ഞ ദിവസം ആരോപിച്ചിരുന്നു. മാനഭംഗത്തിനിരയായ കന്യാസ്ത്രീയെ അപകീര്ത്തിപ്പെടുത്തുന്ന പരാതി ഭീഷണിപ്പെടുത്തി എഴുതിവാങ്ങി എന്നായിരുന്നു ആരോപണം. ഇക്കാര്യം പുറത്തു പറഞ്ഞാല് കൊല്ലുമെന്നും ഭീഷണിപ്പെടുത്തി. ഇക്കാര്യങ്ങള് പറഞ്ഞ് മകള് ജലന്ധറില് നിന്ന് 2017 നവംബറില് തനിക്ക് കത്തെഴുതിയെന്നും ആലപ്പുഴ സ്വദേശിയായ കന്യാസ്ത്രീയുടെ പിതാവ് പറഞ്ഞു.
ഇതിനിടെ, ബിഷപ്പ് മാനസികമായി പീഡിപ്പിച്ചിരുന്നുവെന്നും സ്ഥലംമാറ്റവും അവധിയുമൊക്കെ തീരുമാനിച്ചിരുന്നത് ബിഷപ്പ് ഫ്രാങ്കോ മുളയ്ക്കല് ആയിരുന്നുവെന്നും ചൂണ്ടിക്കാട്ടി നിരവധിപ്പേര് രംഗത്തെത്തി. ബിഷപ്പ് ഉള്പ്പെടെയുള്ളവരുടെ പീഡനത്തെ തുടര്ന്ന് ഫോര്മേറ്റര് (കന്യാസ്ത്രീ ആകുന്നതുവരെ ഓരോ ഘട്ടത്തിലും അവരെ സഹായിക്കാന് നിയോഗിക്കപ്പെട്ടവര്) ഉള്പ്പെടെ 18 പേരാണ് സഭ വിട്ടുപോയതെന്നും പരാതിയില് പറയുന്നു.
ജലന്ധര് രൂപതാ ബിഷപ്പ് ഫ്രാങ്കോ മുളയ്ക്കലിനെതിരെ നിരവധി കന്യാസ്ത്രീകളാണ് മിഷനറീസ് ഓഫ് ജീസസ് (എംജെ) സന്യാസ സമൂഹത്തിന്റെ മദര് ജനറലിന് പരാതി നല്കിയിരുന്നത്. പുരോഹിതന് എന്നതിനെക്കാള് ഒരു രാഷ്ട്രീയക്കാരനും ബിസിനസ്സുകാരനുമാണ് ബിഷപ്പ് ഫ്രാങ്കോയെന്നാണ് ഒരു കന്യാസ്ത്രീ നല്കിയ പരാതിയില് പറയുന്നത്. തങ്ങളുടെ സന്യാസ സമൂഹത്തെ നശിപ്പിക്കുന്നതിനാണ് ബിഷപ്പിന്റെ ശ്രമം. സഭാ നേതൃത്വവും അതിന് കൂട്ടുനില്ക്കുന്നു. തനിക്ക് എതിരായി ശബ്ദമുയര്ത്തുന്നവരെ ബിഷപ്പ് മാനസികമായി പീഡിപ്പിക്കുകയാണ്. സന്യാസസഭയുടെ രക്ഷാധികാരി എന്ന അധികാരം മാത്രമുള്ള ബിഷപ്പ് കന്യാസ്ത്രീമാരുടെ വാര്ഷികാവധി നിശ്ചയിക്കുന്നതിലും സ്ഥലംമാറ്റം പോലുള്ള ചെറിയകാര്യങ്ങളില് വരെ ഇടപെടുന്നുവെന്നും പരാതിയിലുണ്ട്.
മറ്റൊരു കന്യാസ്ത്രീ എഴുതിയ കത്തിലാകട്ടെ ബിഷപ്പിനെതിരെയോ, സഭാ നേതൃത്വത്തിനെതിരെയോ ശബ്ദിക്കാന് പോലും ആരുമില്ലെന്നാണ് പറയുന്നത്. ബിഷപ്പ് ഫ്രാങ്കോയെ സന്തോഷിപ്പിക്കുന്ന നടപടികള്ക്ക് മാത്രമാണ് മദര് ജനറല് അടക്കമുള്ളവരുടെ അധികാരം വിനിയോഗിക്കുന്നത്. തനിക്കെതിരായ ശബ്ദങ്ങളെ ബിഷപ്പ് അടിച്ചമര്ത്തുന്നത് പോലെയാണ് മദര് ജനറലും പെരുമാറുന്നത്. ബിഷപ്പിന്റെ സ്വാര്ത്ഥതയ്ക്കും അനീതിക്കും സഭാ നേതൃത്വം കൂട്ടു നില്ക്കുന്നു. കഴിഞ്ഞ മൂന്നുവര്ഷത്തിനിടെ മുതിര്ന്ന കന്യാസ്ത്രീകളടക്കം 18 പേരാണ് സഭ വിട്ടുപോയത്. സഭ വിട്ടുപോയ ഓരോ കന്യാസ്ത്രീയുടെയും പേരും അവര് വിട്ടുപോകാനിടയായ സഹചര്യങ്ങളും കത്തില് വിവരിക്കുന്നുണ്ട്.
പരാതി ഉന്നയിച്ചപ്പോള് തന്നെ ഒത്തുതീര്പ്പ് ചര്ച്ചകള്ക്കായി സഭ ശ്രമിച്ചുവെന്നും ജലന്ധര് രൂപത കന്യാസ്ത്രിയെയും കുടുംബത്തെയും ഭീഷണിപ്പെടുത്തിയെന്നും വൈദികന് പറഞ്ഞു.