മഴക്കെടുതി ; സഹായവുമായി കമല്‍ഹാസന്‍ സൂര്യ എന്നിവരും
മഴ മൂലം കേരളത്തില്‍ ഉണ്ടായ നാശനഷ്ടങ്ങള്‍ക്ക് ഒരു കൈ സഹായവുമായി തമിഴ് സിനിമാ ലോകം. തമിഴ് സിനിമയിലെ മുന്‍നിര നടന്മാരായ സൂര്യ കാര്‍ത്തി എന്നിവര്‍ക്ക് പുറമേ നടനും മക്കള്‍ നീതിയിലേക്ക് മയ്യം നേതാവുമായ കമല്‍ഹാസനും മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന നല്‍കി.
ഇരുപത്തിയഞ്ചുലക്ഷം രൂപയാണ് കമല്‍ ധനസഹായം നല്‍കിയത്. വെള്ളപ്പൊക്കം മൂലം കേരളത്തിലുണ്ടായ അസാധാരണ സാഹചര്യം മനസ്സിലാക്കി ദുരിതാശ്വാസനിധിയിലേക്ക് 25 ലക്ഷം രൂപ നല്‍കിയ കമല്‍ഹാസനെ അഭിനന്ദിക്കുന്നു. കൂടാതെ വിജയ് ടി.വി യും 25 ലക്ഷം രൂപ നല്‍കിയിട്ടുണ്ടെന്ന് മുഖ്യമന്ത്രി അറിയിച്ചു.
കൂടാതെ മുഖ്യമന്ത്രിയുടെ ദുരിതാശ്വാസ നിധിയിലേക്ക് ഉദാരമായി സംഭാവന നല്‍കണമെന്ന് കമല്‍ഹാസന്‍ തന്റെ ആരാധകരോടും തമിഴ് ജനതയോടും പാര്‍ട്ടി പ്രവര്‍ത്തകരോടും അഭ്യര്‍ത്ഥിക്കുകയും ചെയ്തു. അദ്ദേഹത്തിന്റെ സന്മനസ്സിന് നന്ദിയുണ്ടെന്നും പിണറായി അറിയിച്ചു.
നേരത്തെ, പ്രളയ ബാധിതര്‍ക്ക് സഹായ ഹസ്തവുമായി തമിഴ് നടന്മാരായ സൂര്യയും കാര്‍ത്തിയും കൂടി 25 ലക്ഷം രൂപ നല്‍കിയിരുന്നു. ദുരിതബാധിതര്‍ക്കായി തമിഴ്‌നാടും കര്‍ണാടകയും ധനസഹായം പ്രഖ്യാപിച്ചിരുന്നു. ഇതിനു പിന്നാലെയാണ് തമിഴ് സിനിമാ ലോകവും രംഗത്ത് വന്നത്.
