മൂന്ന് വര്‍ഷത്തിനുള്ളില്‍ കേരളം ഉയിര്‍ത്തെഴുന്നേല്‍ക്കുമെന്ന് കമല്‍ ഹാസന്
ചെന്നൈ : കേരളത്തെ പ്രകീര്‍ത്തിച്ച് നടന്‍ കമല്‍ ഹാസന്. തമിഴ്‌നാട്ടില്‍ നടന്ന ഒരു പരിപാടിക്കിടെ നടനായ പാര്‍ത്ഥിപന്റെ ചോദ്യത്തിന് മറുപടി പറയുന്നതിനിടയിലാണ് കമല്‍ ഇത്തരത്തില്‍ അഭിപ്രായപ്പെട്ടത്. തമിഴ്‌നാട് മുഖ്യമന്ത്രിയായാല്‍ ജനങ്ങള്‍ക്ക് വേണ്ടി എന്തു ചെയ്യുമെന്നായിരുന്നു ചോദ്യം. ഒരു വ്യക്തി മാത്രം വിചാരിച്ചാല്‍ മാറ്റമുണ്ടാകില്ലെന്നും അതിനായി കൂട്ടായ പ്രവര്‍ത്തനം ആവശ്യമാണെന്നും പറഞ്ഞ കമല്‍ ഇക്കാര്യം വിശദീകരിക്കാന്‍ ഉദാഹരണമായി ചൂണ്ടിക്കാട്ടിയത് കേരളത്തെയായിരുന്നു.
വെള്ളപ്പൊക്കത്തില്‍ മുക്കാല്‍ ഭാഗവും മുങ്ങിപ്പോയ കേരളത്തിലേക്ക് നോക്കൂ. അവര്‍ക്ക് വെറും മൂന്നു വര്‍ഷം കൊടുക്കുക, ഈ കെടുതിയില്‍ നിന്ന് കേരളം ഉയിര്‍ത്തെഴുന്നേല്‍ക്കുന്നത് കാണാംകമല്‍ പറഞ്ഞു. ഇതിന് കാരണം ഒരു പിണറായി വിജയന്‍ മാത്രമല്ല. അവിടുത്തെ ജനങ്ങള്‍, അവര്‍ ഒരുമിച്ചാണ് പുനര്‍ നിര്‍മാണത്തിനായി പ്രവര്‍ത്തിക്കുന്നത്. പിണറായി വിജയന്‍ മികച്ച ഒരു രാഷ്ട്രീയ നേതാവാണ്. കുറച്ച് നിയമം കൊണ്ടു വന്ന്, കുറച്ച് ഉദ്യോഗസ്ഥരെ നിയമിച്ച് ചെയ്യാവുന്ന ഒരു വിഷയമല്ല ഇതെന്നും കമല്‍ ചൂണ്ടിക്കാട്ടി.
