വിവാഹേതര ലൈംഗിക ബന്ധം ക്രിമിനല് കുറ്റമല്ല എന്ന് സുപ്രീം കോടതി ; 497 -ാം വകുപ്പ് റദ്ദാക്കി
വിവാഹേതര ലൈംഗിക ബന്ധങ്ങള് ക്രിനിനല് കുറ്റമല്ലെന്ന് സുപ്രീം കോടതി . വിവാഹേതര ലൈംഗിക ബന്ധം ക്രിമിനല് കുറ്റമാക്കുന്ന ഐ.പി.സി 497-ആം വകുപ്പ് റദ്ദാക്കണമെന്ന് ആവശ്യപ്പെട്ടുള്ള ഹര്ജിയിലാണ് കോടതി വിധി പ്രസ്താവിച്ചത് . ഭര്ത്താവ് സ്ത്രീകളുടെ യജമാനന് അല്ല, സ്ത്രീകളുടെ ആത്മാഭിമാനം സുപ്രധാനമാണെന്ന് സുപ്രീം കോടതി വിധിയില് വ്യക്തമാക്കി.
വിവാഹമോചനത്തിന് വിവേഹേതര ലൈംഗികബന്ധം കാരണമാകാം. എന്നാല് അതൊരു ക്രിമിനല് കുറ്റമല്ല. സമൂഹത്തിന്റെ താല്പര്യത്തിനനുസരിച്ച് ചിന്തിക്കണമെന്നും ജീവിക്കണമെന്നും സ്ത്രീയോട് ആവശ്യപ്പെടാനാവില്ല. ജനാധിപത്യത്തിന്റെ സൗന്ദര്യം ഞാനും നീയും നമ്മളും എന്നതാണ്. ഒരു ലിംഗത്തിന് മേല് മറ്റൊരു ലിംഗത്തിന് നല്കുന്ന പരമാധികാരം തെറ്റാണെന്നും വിധിയില് പറയുന്നു. ചീഫ് ജസ്റ്റിസ് ദീപക് മിശ്ര അധ്യക്ഷനായ ഭരണഘടനാ ബെഞ്ചിന്റേതാണ് വിധി. ജസ്റ്റിസ് നരിമാനാണ് വിധിപ്രസ്താവം നടത്തിയത്.
സ്ത്രീകളുടെ ആത്മാഭിമാനം മാനിക്കാത്തത് ഭരണഘടനാ വിരുദ്ധമാണെന്നും വിധിപ്രസ്താവത്തില് പറയുന്നു. വിവാഹേതര ബന്ധത്തിന്റെ പേരില് പങ്കാളി ആത്മഹത്യ ചെയ്താല് തെളിവുകളുണ്ടെങ്കില് ആത്മഹത്യാ പ്രേരണയ്ക്ക് കേസെടുക്കാം. ചീഫ് ജസ്റ്റിസ് ദീപക് മിശ്രയും ജസ്റ്റിസ് ഖാന്വില്ക്കറും വിധി പ്രസാതാവത്തില് വ്യക്തമാക്കി. സമൂഹം പറയുന്നതുപോലെ പ്രവര്ത്തിക്കാന് സ്ത്രീ ബാധ്യസ്ഥയല്ലെന്നും ഇരുവരും വ്യക്തമാക്കി. സെക്ഷന് 497 ഭരണഘടനാ വിരുദ്ധമാണെന്നും നീക്കം ചെയ്യേണ്ടതാണെന്നും ജസ്റ്റിസ് ആര്.എഫ്. നരിമാനും വിലയിരുത്തി.
മലയാളിയായ ജോസഫ് ഷൈനാണ് 497 ആം വകുപ്പ് ചോദ്യം ചെയ്ത് സുപ്രീംകോടതിയെ സമീപിച്ചത്. കേസ് പരിഗണിച്ചപ്പോള് ഈ വകുപ്പ് റദ്ദാക്കരുതെന്നാണ് കേന്ദ്ര സര്ക്കാര് ആവശ്യപ്പെട്ടത്. റദ്ദാക്കിയാല് വിവാഹം എന്ന സമ്പ്രദായം തന്നെ തകരുമെന്നും കേന്ദ്ര സര്ക്കാര് വാദിച്ചിരുന്നു. നിലവിലെ നിയമപ്രകാരം പുരുഷനെ ശിക്ഷിക്കാന് മാത്രമെ വ്യവസ്ഥയുള്ളു. ഇത് വിവേചനമാണെന്നും ഭരണഘടന വിരുദ്ധമാണെന്നും ഹര്ജിയില് പറയുന്നു. ഉഭയ സമ്മതത്തോടെ ഒരാള് മറ്റൊരാളുടെ ഭാര്യയുമായി ലൈംഗിക ബന്ധത്തില് ഏര്പ്പെട്ടാല് അയാള് എന്തിന് ജയിലില് പോകണം എന്നായിരുന്നു ഹര്ജിക്കാരന്റെ വാദം.
വിവാഹേതര ബന്ധത്തില് ഏര്പ്പെടുന്ന സ്ത്രീയെയും കുറ്റക്കാരിയാക്കണമെന്ന പൊതുതാല്പര്യ ഹര്ജിയില് വിധി പറയുകയാണു സുപ്രീംകോടതി. നിലവില് ഇന്ത്യന് ശിക്ഷാനിയമത്തിലെ 497-ാം വകുപ്പ് വിവാഹേതര ബന്ധത്തിലേര്പ്പെടുന്ന പുരുഷന്മാര്ക്കെതിരെ മാത്രമാണ്.