കനത്ത കാറ്റും മഴയും ; ചാലക്കുടിയില്‍ വ്യാപക നാശനഷ്ടം
ശക്തമായ കാറ്റിലും മഴയിലും ചാലക്കുടിയില്‍ വ്യാപക നാശനഷ്ടം. നഗരത്തില്‍ പലയിടത്തും ഗതാഗതം തടസ്സപ്പെടുകയും റോഡുകളില്‍ വെള്ളക്കെട്ട് രൂപപ്പെടുകയും ചെയ്തു. കാറ്റില്‍ പല കെട്ടിടങ്ങളുടെയും മേല്‍ക്കൂര പറന്നുപോയി. നഗരത്തിലെ സുരഭി സിനിമാ തീയറ്ററിന്റെ മേല്‍ക്കൂരയും കാറ്റില്‍ പറന്നു.
സിനിമ നടക്കുന്നlതിനിടയില്‍ മേല്‍ക്കൂര പറന്നുപോയതോടെ പരിഭ്രാന്തരായ കാണികള്‍ എഴുന്നേറ്റോടി. നഗരമധ്യത്തിലുള്ള ബിജെപി ഓഫീസിന്റെയും മേല്‍ക്കൂര പറന്നുപോയിട്ടുണ്ട്. റോഡില്‍ നിര്‍ത്തിയിട്ട ഓട്ടോകള്‍ ശക്തമായ കാറ്റില്‍ ഉരുണ്ടുപോയതായാണ് നാട്ടുകാര്‍ പറയുന്നത്.
പല പ്രധാനറോഡുകളിലും മരം വീണും ഗതാഗതതടസ്സമുണ്ടായി. റെയില്‍വേ സ്റ്റേഷന്‍ റോഡില്‍ മരം വീണ് ഗതാഗതം തടസ്സപ്പെട്ടതിനെത്തുടര്‍ന്ന് ഏറെ നേരം ട്രാഫിക് ബ്ലോക്കുമുണ്ടായി. ഇപ്പോള്‍ മഴയ്ക്ക് നേരിയ ശമനമുണ്ടെങ്കിലും മുന്നറിയിപ്പില്ലാതെ പെയ്ത കനത്ത മഴയില്‍ പരിഭ്രാന്തിയിലാണ് ജനങ്ങള്‍.
വൈകിട്ട് അഞ്ചേകാലോടുകൂടിയാണ് ചാലക്കുടിയില്‍ മഴ ശക്തമായത്. വ്യാപാര സ്ഥാപനങ്ങളുടെയും വീടുകളുടെയും മേല്‍ക്കൂരകള്‍ ഇളകിവീഴുന്ന അവസ്ഥയുണ്ടായി.
