ബാലുവും മകളും ഇല്ലാത്ത ലോകത്തില്‍ ലക്ഷ്മി ഇനി തനിച്ച് ; ലക്ഷ്മിക്കു ബോധം തെളിഞ്ഞു എന്ന് റിപ്പോര്‍ട്ട്
പ്രിയപ്പെട്ടവനും മകളും ഇല്ലാത്ത ലോകത്തില്‍ അപകടത്തിനു ശേഷം ബോധം തിരിച്ചു കിട്ടി ലക്ഷ്മി. വാഹനാപകടത്തില്‍ മരണപ്പെട്ട വയലിനിസ്റ്റ് ബാലഭാസ്‌കറിന്റെ ഭാര്യ ലക്ഷ്മിക്കു ബോധം തെളിഞ്ഞു. സുഹൃത്തും സംഗീതജ്ഞനുമായ സ്റ്റീഫന്‍ ദേവസ്സിയാണ് ഈ കാര്യം അറിയിച്ചത്. അതേസമയം ബാലഭാസ്‌കറിന്റെയും മകള്‍ തേജസ്വിനി ബാലയുടെയും മരണം ഇതുവരെ ലക്ഷ്മിയെ അറിയിച്ചിട്ടില്ലെന്നും സ്റ്റീഫന്‍ പറഞ്ഞു. തിങ്കളാഴ്ചയോടെ ലക്ഷ്മിയെ വെന്റിലേറ്ററില്‍നിന്നു മാറ്റുമെന്നാണു പ്രതീക്ഷയെന്നും സ്റ്റീഫന്‍ കൂട്ടിച്ചേര്‍ത്തു.
സ്റ്റീഫന്റെ വാക്കുകള്‍ ഇങ്ങനെ: ‘ഇന്നലെ വൈകിട്ട് ലക്ഷ്മിയുടെ ആരോഗ്യനിലയുമായി ബന്ധപ്പെട്ടു ഡോ. സുരേഷിനോടു സംസാരിച്ചിരുന്നു. ലക്ഷ്മി കഴിഞ്ഞ ദിവസം കണ്ണുതുറന്നതായി ഡോക്ടര്‍ അറിയിച്ചു. ലക്ഷ്മിക്കു ബോധം തെളിഞ്ഞിരുന്നു. ഇപ്പോള്‍ അവര്‍ക്ക് എല്ലാം കേള്‍ക്കാനും കാണാനും തിരിച്ചറിയാന്‍ കഴിയുന്നുണ്ട്. അവര്‍ പ്രതികരിക്കുന്നുണ്ട്. പക്ഷേ, സംസാരിക്കാന്‍ സാധിക്കുന്നില്ല. ഇപ്പോഴും വെന്റിലേറ്ററില്‍ തന്നെയാണ്.
ദുരന്തത്തെക്കുറിച്ച് അവര്‍ക്കിപ്പോഴും ഒന്നും അറിയില്ല. അവരോട് എങ്ങനെ ഇതു പറയുമെന്നറിയില്ല. തിങ്കളാഴ്ചയോടെ ലക്ഷ്മിയെ വെന്റിലേറ്ററില്‍നിന്ന് ഐസിയുവിലേക്കോ റൂമിലേക്കോ മാറ്റാന്‍ സാധിക്കുമെന്നാണു പ്രതീക്ഷ. ലക്ഷ്മി ഉറപ്പായും തിരിച്ചുവരും എന്നാണു ഡോക്ടര്‍ പറയുന്നത്.
അതു പോസിറ്റീവ് ആയി നമുക്ക് കാണാം. ലക്ഷ്മിയെ ബാലയുടെ കുടുംബവും അവരുടെ കുടുംബവും ഈ വിവരങ്ങളെല്ലാം അറിയിക്കേണ്ടതുണ്ട്. ലക്ഷ്മിക്ക് ഇതെല്ലാം കേള്‍ക്കാനുള്ള ആത്മധൈര്യം ഉണ്ടാകട്ടെ എന്നു നമുക്ക് പ്രാര്‍ഥിക്കാം. ലക്ഷ്മിക്ക് എങ്ങനെ താങ്ങാന്‍ പറ്റുമെന്ന് അറിയില്ല. ബാലുവിനെ സ്‌നേഹിക്കുന്നവരെല്ലാം പ്രാര്‍ഥിക്കും.’ സ്റ്റീഫന്‍ പറയുന്നു.
