കൊച്ചുണ്ണിയില്‍ കൊച്ചുപിള്ള എന്ന ശക്തമായ വേഷത്തില്‍ ഷൈന്‍ ടോം ചാക്കോ
മുഹമ്മദ്‌ ആഷിക്
ശ്രീഗോകുലം മൂവീസിന്റെ ബാനറില്‍ ഗോകുലം ഗോപാലന്‍ നിര്‍മിച്ചു ബോബി-സഞ്ജയ് തിരക്കഥ എഴുതി റോഷന്‍ ആന്‍ഡ്രൂസ് സംവിധാനം ചെയ്യുന്ന കായംകുളം കൊച്ചുണ്ണി പ്രദര്‍ശനത്തിനൊരുങ്ങുന്നു. നിവിന്‍ പോളി കേന്ദ്ര കഥാപാത്രത്തെ അവതരിപ്പിക്കുന്ന ചിത്രത്തില്‍ ശക്തമായ വേഷത്തില്‍ എത്തുകയാണ് യുവ താരം ഷൈന്‍ ടോം ചാക്കോ. ഷൈന്‍ ടോമിന്റെ കരിയര്‍ തന്നെ മാറ്റി മറിച്ചേക്കാവുന്നതാണ് ഈ ബ്രഹ്മാണ്ഡചിത്രത്തിലെ കൊച്ചുപിള്ള എന്ന കഥാപാത്രം.
കായംകുളം കൊച്ചുണ്ണിയുടെ സുഹൃത്തായി സവര്‍ണ മേധാവിത്തത്തിനെതിരെ സംസാരിക്കുന്ന തികച്ചും വ്യത്യസ്തമായ ശക്തമായ കഥാപാത്രമാണ് ഷൈനിന്റെത്. പഴയ കാലങ്ങളില്‍ നിലനിന്നിരുന്ന സവര്‍ണകുലജാതരില്‍ നിന്നും തീര്‍ത്തും വ്യത്യസ്തമായി സഞ്ചരിക്കുന്ന ഒരു ഉന്നത ജാതിയില്‍ പെട്ട കഥാപാത്രമായാണ് ഷൈന്‍ ചിത്രത്തില്‍ പ്രത്യക്ഷപ്പെടുന്നത്.
പഴയ കാലങ്ങളില്‍ നില നിന്ന ജാതിവ്യവസ്ഥകളെ,അനാചാരങ്ങളെ തുറന്നു കാട്ടുന്ന ഒരു ചിത്രം കൂടിയാകും കായംകുളം കൊച്ചുണ്ണി എന്നതില്‍ തര്‍ക്കം വേണ്ട. ചുരുക്കത്തില്‍ പറഞ്ഞാല്‍ കൊച്ചുണ്ണിയും ഇത്തിക്കര പക്കിയും മാത്രമായിരിക്കില്ല കൊച്ചുപിള്ളയും പ്രേക്ഷക ഹൃദയങ്ങളില്‍ സ്ഥാനം നേടും എന്ന കാര്യത്തില്‍ സംശയം വേണ്ട എന്നാണു ചിത്രത്തിന്റെ അണിയറക്കാര്‍ പറയുന്നത്.
മികച്ച കഥാപാത്രങ്ങള്‍ ചെയ്തിട്ടും കിട്ടാതെ പോയ അര്‍ഹിക്കപെട്ട പരിഗണന കായംകുളം കൊച്ചുണ്ണിയിലൂടെ ഷൈന്‍ ടോം നേടി എടുക്കും എന്നാണു നടന്റെ ആരാധകര്‍ പ്രതീക്ഷിക്കുന്നത്. കൂടാതെ സിനിമാ ജീവിതത്തില്‍ ഏറ്റ തിരിച്ചടികളില്‍ നിന്നും കരകയറിയ ഷൈന്‍ കൊച്ചുണ്ണിയിലൂടെ മലയാള സിനിമയില്‍ തന്റേതായ സ്ഥാനം ഉറപ്പിക്കും എന്നും ആരാധകര്‍ വിശ്വസിക്കുന്നു.
