വെടിയൊച്ചകള്‍ നിലയ്ക്കാതെ അമേരിക്ക ; വീണ്ടും വെടിവെപ്പ്, 13 പേര്‍ കൊല്ലപ്പെട്ടു
അമേരിക്കയില്‍ വീണ്ടും വെടിവെപ്പ്. യു.എസിലെ ലോസ് ആഞ്ജലിസിന് സമീപമുള്ള നൈറ്റ്ക്ലബ്ബിലുണ്ടായ വെടിവെപ്പില്‍ പോലീസ് ഉദ്യോഗസ്ഥനടക്കം 13 പേര്‍ കൊല്ലപ്പെട്ടു. ലോസ് ആഞ്ജലിസിലെ തൗസന്റ് ഓക്‌സ് എന്ന നഗരത്തിലുള്ള ബോര്‍ഡര്‍ലൈന്‍ ബാര്‍ ആന്‍ഡ് ഗ്രില്‍ എന്ന ക്ലബ്ബിലാണ് വെടിവെപ്പ് നടന്നത്. സംഭവത്തില്‍ നിരവധി പേര്‍ക്ക് പരിക്കേറ്റിട്ടുണ്ട്. വെടിവെപ്പ് നടത്തിയ അക്രമിയും കൊല്ലപ്പെട്ടതായാണ് വിവരം.
കോളേജ് വിദ്യാര്‍ഥികള്‍ക്കായി ക്ലബ്ബില്‍ സംഘടിപ്പിച്ച പരിപാടിക്കിടെയാണ് വെടിവെപ്പുണ്ടായത്. പരിപാടികള്‍ നടക്കുന്നതിനു ഇടയില്‍ ബാറിലേക്ക് എത്തിയ അക്രമി എത്തിയ ഉടന്‍ തന്നെ നിറയൊഴിക്കുകയുമായിരുന്നുവെന്നാണ് റിപ്പോര്‍ട്ടുകള്‍. അക്രമിയെ തിരിച്ചറിഞ്ഞിട്ടില്ല. വെടിവെപ്പ് വിവരം അറിഞ്ഞെത്തിയപ്പോള്‍ തന്നെ ഇയാളെ മരിച്ചനിലയിലാണ് കണ്ടെത്തിയതെന്നും പോലീസ് പറയുന്നു.
