പ്രളയം ; കേന്ദ്രം ദുരിതാശ്വാസതുക നല്‍കിയില്ല എന്ന് പിണറായി വിജയന്‍
പ്രളയത്തില്‍ കേന്ദ്രസര്‍ക്കാരിനെ വീണ്ടും രൂക്ഷമായി വിമര്‍ശിച്ച് മുഖ്യമന്ത്രി പിണറായി വിജയന്‍. കേരളം ചോദിച്ച അയ്യായിരം കോടി രൂപയുടെ പാക്കേജില്‍പ്പോലും ഇനിയും തീരുമാനമായിട്ടില്ലെന്നു പിണറായി പറഞ്ഞു. കേരളത്തിന് മഹാപ്രളയത്തില്‍ സംഭവിച്ചത് 31,000 കോടി രൂപയിലധികം നഷ്ടമാണ്. ഇത് നികത്താന്‍ കൃത്യമായ സഹായം നല്‍കുന്നതിന് പകരം കേന്ദ്രം ഗുരുതരമായ അലംഭാവം കാണിക്കുകയാണ്.
പ്രളയകാലത്ത് ഏകോപനം ഉണ്ടാക്കാന്‍ കഴിഞ്ഞത് ദൃഢമായ മതനിരപേക്ഷതയുടെ ഫലമായാണെന്ന് മുഖ്യമന്ത്രി പറഞ്ഞു.. നവോത്ഥാനമൂല്യങ്ങളില്‍ ഉറച്ചു വിശ്വസിക്കുന്ന ജനതയാണ് നമ്മള്‍. ആ കൂട്ടായ്മയില്‍ വിശ്വസിച്ച് മുന്നോട്ട് പോകണം. അതിനെ തകര്‍ക്കാന്‍ ശക്തികള്‍ മുന്നോട്ടുവന്നാല്‍ അതിനെ നേരിടണമെന്നും മുഖ്യമന്ത്രി ആവശ്യപ്പെട്ടു.
നാശനഷ്ടങ്ങളുടെ വിശദമായ പഠനം നടത്തിയിട്ടുണ്ട്. ലോകബാങ്കും ഐക്യരാഷ്ട്രസഭയും പഠനം നടത്തി. 31,000 കോടി രൂപയുടെ നാശനഷ്ടം ഉണ്ടായതായാണ് അവര്‍ കണക്കാക്കിയിട്ടുള്ളത്. യഥാര്‍ഥ നഷ്ടം ഇതിലുമധികമാണ്. 26,000 കോടി രൂപ ഇനിയും സംസ്ഥാനം കണ്ടെത്തണം. അതിനാണ് സംസ്ഥാനമെന്ന നിലയില്‍ വായ്പാപരിധി മൂന്ന് ശതമാനത്തില്‍ നിന്ന് നാലരശതമാനമായി ഉയര്‍ത്തണമെന്നാവശ്യപ്പെട്ടത്.
ഒപ്പം നബാര്‍ഡില്‍ നിന്ന് 2500 കോടി രൂപയുടെ വായ്പ അനുവദിക്കണം, ലോകബാങ്ക്, എഡിബി എന്നിവയുടെ വായ്പ ലഭ്യമാക്കണം, കേന്ദ്രാവിഷ്‌കൃതപദ്ധതികളിലൂടെ ധനസഹായം പത്ത് ശതമാനം വര്‍ധിപ്പിക്കണം എന്നീ ആവശ്യങ്ങള്‍ ഉന്നയിച്ചു. ജിഎസ്ടി കൗണ്‍സില്‍ യോഗത്തില്‍ കേരളത്തിനെ സെസ്സ് ഏര്‍പ്പെടുത്തി സഹായിക്കാമെന്ന് കേന്ദ്രധനമന്ത്രി സമ്മതിച്ചതാണ്. എന്നാല്‍ ഇതൊന്നും പ്രാവര്‍ത്തികമാക്കാനുള്ള നടപടിയുണ്ടായിട്ടില്ലെന്നും പിണറായി വ്യക്തമാക്കി.
പുനര്‍നിര്‍മാണത്തിന് വേണ്ട സഹായം കേന്ദ്രം കൃത്യമായി നല്‍കുന്നില്ല. പ്രധാനമന്ത്രിയും കേന്ദ്ര ആഭ്യന്തരമന്ത്രിയും പ്രളയകാലത്ത് കേരളം സന്ദര്‍ശിച്ചതാണ്. നാശനഷ്ടങ്ങളെക്കുറിച്ച് അവര്‍ നേരിട്ട് കണ്ടറിഞ്ഞതാണ്. സ്വാഭാവികമായും കേന്ദ്രസഹായം ലഭിയ്ക്കുമെന്നായിരുന്നു പ്രതീക്ഷ. പക്ഷേ അര്‍ഹതപ്പെട്ടത് ഇനിയും കിട്ടിയില്ല. മാത്രമല്ല, സഹായിക്കാന്‍ തയ്യാറായി മുന്നോട്ടു വന്ന യുഎഇയെപ്പോലുള്ള രാജ്യങ്ങളുടെ സഹായം വേണ്ടെന്ന നിലപാടെടുമെടുത്തു. കേരളത്തിന്റെ പുനര്‍നിര്‍മാണത്തിന് കിട്ടുമായിരുന്ന വലിയ തുകയാണ് ഇതുവഴി നഷ്ടമായതെന്ന് മുഖ്യമന്ത്രി വ്യക്തമാക്കി.
ദേശീയ ദുരന്തനിവാരണമാന്വല്‍ പ്രകാരം കേരളത്തിന് വിദേശരാജ്യങ്ങള്‍ സ്വമേധയാ നല്‍കുന്ന സഹായം സ്വീകരിക്കാവുന്നതാണ്. പ്രവാസിമലയാളികള്‍ ഫണ്ട് സമാഹരിക്കാന്‍ ശ്രമിക്കുകയാണ്. അതിനായി മന്ത്രിമാര്‍ വിദേശങ്ങളിലേക്ക് പോകാന്‍ ശ്രമിച്ചപ്പോള്‍ അതിനുള്ള കേന്ദ്രാനുമതി സര്‍ക്കാര്‍ തടഞ്ഞു. അതെന്തിനെന്ന് മനസ്സിലാകുന്നില്ലെന്നും മുഖ്യമന്ത്രി പറഞ്ഞു.
5616 കോടിയാണ് മൊത്തത്തില്‍ സംസ്ഥാനം കേന്ദ്രസര്‍ക്കാരിനോട് ചോദിച്ചത്. പ്രത്യേകധനസഹായമായി അയ്യായിരം കോടി രൂപയുടെ പാക്കേജ് അനുവദിക്കണമെന്നും ആവശ്യപ്പെട്ടു. ഇതാകെ അനുവദിച്ചാലും സംഭവിച്ച നഷ്ടം നികത്താനാകില്ല. എങ്കിലും ഈ ചോദിച്ചതില്‍പ്പോലും ഫലപ്രദമായ നടപടിയുണ്ടായിട്ടില്ല.
