പെൺകുട്ടികളെ പ്രസവിച്ചതിന്‍റെ പേരിൽ കുടുംബത്തെ ഉപേക്ഷിച്ച് മലയാളി മുങ്ങി ; ശ്രീലങ്കക്കാരിയായ അമ്മയും നാല് മക്കളും ദുബായില്‍ ദുരിതത്തില്‍
ദുബായ് : പെണ്‍കുട്ടികളെ പ്രസവിച്ചു എന്ന പേരില്‍ മലയാളിയായ പ്രവാസി ഉപേക്ഷിച്ച ഭാര്യയും നാല് മക്കളും അധികൃതരുടെ സഹായം തേടുന്നു. ഇരുപത് വര്‍ഷത്തോളമായി പാസ്‌പോര്‍ട്ടും വിസയുമില്ലാതെ അല്‍ ഖൈനിലെ ഒറ്റമുറി ഫ്‌ലാറ്റില്‍ കഴിയുന്ന അഞ്ചംഗ കുടംബമാണ് നാട്ടിലേക്ക് മടങ്ങാന്‍ അധികാരികളുടെ സഹായം തേടുന്നത്. ശ്രീലങ്കന്‍ സ്വദേശിനിയായ ഫാത്തിമയും നാല് പെണ്മക്കളുമാണ് ദുരിതത്തില്‍ കഴിയുന്നത്.
1991 ല്‍ ജോലി തേടി ദുബായില്‍ എത്തിയ ഫാത്തിമ 94 ലാണ് പാലക്കാട് സ്വദേശി ചാരപ്പറമ്പില്‍ അബ്ദുല്‍ സമദുമായി പ്രണയത്തിലാവുന്നതും തുടര്‍ന്ന് വിവാഹം കഴിക്കുന്നതും. 19 വര്‍ഷത്തിനിടെ ഇരുവര്‍ക്കും നാല് പെണ്‍മക്കള്‍ ഉണ്ടായെങ്കിലും ഒരിക്കലും സന്തോഷത്തോടെ ജീവിക്കാന്‍ കഴിഞ്ഞില്ലെന്ന് ഫാത്തിമ പറയുന്നു.
അവസാനത്തെ കുട്ടി എങ്കിലും ആണ്‍കുട്ടിയായിരിക്കും എന്ന സമദിന്റെ പ്രതീക്ഷ തെറ്റിച്ച് പെണ്‍കുട്ടിക്ക് ജന്മം നല്‍കിയത്തോടെ ആശുപത്രി കിടക്കയില്‍ വെച്ചും ദ്രോഹിച്ചു. ഒടുവില്‍ പെണ്‍മക്കളെ മാത്രം പ്രസവിക്കുന്ന തന്നെ വേണ്ടെന്ന് പറഞ്ഞ് രണ്ടാഴ്ച തികയും മുമ്പ് ഭര്‍ത്താവ് നാട് വിട്ടതായും ഫാത്തിമ പറയുന്നു.
നാട്ടില്‍ എത്തിയ ശേഷം ഒരുതവണ സമദ് വിളിച്ച് തനിക്ക് ഇവിടെ ഭാര്യയും മൂന്ന് കുട്ടികളും ഉണ്ടെന്നും ഇനി ദുബായിലേക്ക് ഇല്ലെന്നും അറിയിച്ചതായി ഫാത്തിമ പറയുന്നു. 14 മുതല്‍ 20 വയസ്സു വരെയുളള കുട്ടികള്‍ ഇതുവരെ സ്‌കൂളില്‍ പോലും പോയിട്ടില്ല. നാട്ടിലേക്ക് മടങ്ങാന്‍ അധികൃതരുടെ സഹായം തേടുകയാണ് ഈ കുടുംബം ഇപ്പോള്‍.
