ചെന്നൈയിലും തീ പിടുത്തം ; 150 ലേറെ കാറുകള്‍ കത്തി നശിച്ചു
ബംഗളൂരുവിനു പിന്നാലെ ചെന്നൈയിലും കനത്ത തീ പിടുത്തം. പാര്‍ക്കിങ് സ്ഥലത്തുണ്ടായ തീപിടുത്തത്തില്‍ 150 ഓളം കാറുകള്‍ കത്തിനശിച്ചു. ഉണങ്ങിയ പുല്ലുകളില്‍ നിന്നാണ് ഇവിടെയും തീപടര്‍ന്നത്. മൂന്നൂറോളം കാറുകള്‍ പാര്‍ക്കിങ് ഏരിയയില്‍ ഉണ്ടായിരുന്നതായാണ് വിവരം.
ഞായറാഴ്ച ഉച്ചതിരിഞ്ഞ് രണ്ട് മണിയോടെയാണ് സംഭവം. ഒരു സ്വകാര്യ കമ്പനിയുടെ പാര്‍ക്കിങ് സ്ഥലത്താണ് തീപിടുത്തമുണ്ടായത്. തീയണക്കാന്‍ കഴിഞ്ഞെങ്കിലും പ്രദേശത്ത് രൂക്ഷമായ പുകശല്യമുണ്ട്.
സമാനമായ രീതിയില്‍ കഴിഞ്ഞ ദിവസം ബംഗളൂരുവില്‍ എയറോ ഇന്ത്യ ഷോയ്ക്കിടെയും തീ പിടുത്തം ഉണ്ടായിരുന്നു. അവിടെയുണ്ടായ തീപിടുത്തത്തില്‍ മുന്നൂറിലേറെ കാറുകള്‍ കത്തിനശിച്ചിരുന്നു. യെലഹങ്ക വ്യോമസേന താവളത്തിന് സമീപമുള്ള ഗ്രൗണ്ടില്‍ നിര്‍ത്തിയിട്ടിരുന്ന കാറുകള്‍ക്കാണ് തീപിടിച്ചത്. സംഭവത്തില്‍ പൊലീസ് അന്വേഷണം തുടരുകയാണ്.
