ഷാരൂഖ് ഖാനൊപ്പം ഐപിഎൽ കാണാനെത്തിയ അറ്റ്ലീക്കെതിരെ വംശീയാധിക്ഷേപം
ബോളിവുഡ് സൂപ്പര്‍സ്റ്റാര്‍ ഷാരൂഖ് ഖാനൊപ്പം ചെന്നൈ കൊല്‍ക്കൊത്ത ഐപിഎല്‍ മത്സരം കാണാനെത്തിയ തമിഴ് സംവിധായകന്‍ അറ്റ്ലീക്കെതിരെ വംശീയാധിക്ഷേപം. ഇരുവരും ചേര്‍ന്ന് മത്സരം കാണാനിരിക്കുന്ന ചിത്രം വൈറലായതിനു പിന്നാലെയാണ് അറ്റ്ലീക്കെതിരെ വംശീയാധിക്ഷേപവുമായി ചില താരങ്ങളുടെ ആരാധകര്‍ രംഗത്തു വന്നത്.
കഴിഞ്ഞ ദിവസം ചെന്നൈ എം ചിദംബരം സ്റ്റേഡിയത്തില്‍ കൊല്‍ക്കത്ത നൈറ്റ് റൈഡേഴ്‌സും ചെന്നൈ സൂപ്പര്‍ കിംഗ്‌സും തമ്മില്‍ നടന്ന മത്സരത്തിനിടെ ഇരുവരും ഇരിക്കുന്ന ചിത്രങ്ങളാണ് വൈറലായത്. തുടര്‍ന്ന് അറ്റ്‌ലീയുടെ നിറത്തെ പരിഹസിച്ചുള്ള കമന്റുകള്‍ സോഷ്യല്‍ മീഡിയയില്‍ പ്രചരിക്കുകയായിരുന്നു.
അറ്റ്‌ലീയുടെ കഠിനാദ്ധ്വാനമാണ് അദ്ദേഹത്തെ ഷാരൂഖ് ഖാന്റെ അടുത്ത് ഇരിക്കുന്നതിലേക്ക് എത്തിച്ചതെന്ന് ആരാധകര്‍ പറഞ്ഞു. വീട്ടിലിരുന്ന് അദ്ദേഹത്തിന്റെ നിറത്തെക്കുറിച്ച് കമന്റ് ചെയ്യാനല്ലാതെ അധിക്ഷേപിക്കുന്നവര്‍ എന്താണ് നേടിയതെന്നും ആരാധകര്‍ ചോദിച്ചു.
അറ്റ്‌ലീയുടെ പുതിയ ചിത്രത്തില്‍ ഷാരൂഖ് അതിഥി താരമായി എത്തുന്നു എന്നൊരു വാര്‍ത്ത കുറച്ചു ദിവസമായി പ്രചരിക്കുകയാണ്. അതല്ല അറ്റ്‌ലീയുടെ തമിഴില്‍ ഹിറ്റായ ചിത്രം ഹിന്ദിയില്‍ ഷാരൂഖിനെ വെച്ച് റീമേക്ക് ചെയ്യുന്നു എന്നും വാര്‍ത്തകള്‍ പ്രചരിക്കുന്നുണ്ട്.
