ബിജോയ് കണ്ണൂരിന്റെ റീല്‍ പ്രദര്‍ശനത്തിന്
ചെന്നൈ: മലയാളം ആല്‍ബങ്ങളിലൂടെയും ഷോര്‍ട്ട് ഫിലിമുകളിലൂടെയും പ്രശസ്തനായ ബിജോയ് കണ്ണൂര്‍ നായകനാകുന്ന തമിഴ് ചിത്രം ഉടന്‍ പ്രദര്‍ശനത്തിന്. റീല്‍ എന്ന് പേരിട്ടിരിക്കുന്ന ചിത്രത്തിലൂടെ ഉദയ് രാജ് എന്ന പേരിലാണ് അദ്ദേഹം തമിഴില്‍ അരങ്ങേറുന്നത്. മുനുസ്വാമിയാണ് ചിത്രം സംവിധാനം ചെയ്യുന്നത്.
തൊഴില്‍രഹിതനായ ചെറുപ്പക്കാരനും ഗ്രാമീണ പെണ്‍കുട്ടിയും തമ്മിലുള്ള പ്രണയവും, സമൂഹത്തില്‍ നിന്നും അവര്‍ക്ക് നേരിടേണ്ടിവരുന്ന പ്രതികരണവുമാണ് ചിത്രത്തിന്റെ ഇതിവൃത്തം. ഉദയ് രാജ് നായകനാകുന്ന ചിത്രത്തില്‍ അവന്തികയാണ് നായികയാകുന്നത്. ഇവരെ കൂടാതെ വിജയ് ടിവി ഫെയിം ശരത്തും ഈ ചിത്രത്തില്‍ ഒരു പ്രധാനവേഷം ചെയ്യുന്നു
റീല്‍ ഒരു പ്രണയചിത്രമാണെന്നതിലുപരി കഥ പറയുന്ന രീതിയിലും മറ്റും വ്യത്യസ്തത കൊണ്ടുവരാന്‍ ശ്രമിച്ചിട്ടുണ്ട്. സിനിമ ഒരു സന്ദേശവും പ്രേക്ഷകര്‍ക്ക് നല്‍കുന്നുണ്ട്. ക്ലൈമാക്സ് ആണ് ചിത്രത്തിലെ ഹൈലൈറ്റ് പോയിന്റ് എന്നും സംവിധായകന്‍ പറയുന്നു. കോയമ്പത്തൂര്‍, മേലുക്കോട്ടെ, കൊട്ടഗിരി, മൈസൂര്‍ എന്നിവിടങ്ങളിലായാണ് ചിത്രീകരിച്ചിരിക്കുന്നത്.
ശ്രീ മുരുക മൂവി മേക്കര്‍ ആണ് സിനിമ നിര്‍മ്മിക്കുന്നത്. സുനില്‍ പ്രേം സിനിമാറ്റോഗ്രാഫിയും പി സായ്സുരേഷ് എഡിറ്റിംഗും നിര്‍വഹിക്കുന്നു. സന്തോഷ് ചന്ദ്രന്‍ സംഗീതം സംവിധാനം ചെയ്യുന്നു. തമിഴ് നാട്ടിലും കേരളത്തിലും ചിത്രം ഓഗസ്റ്റ് ആദ്യവാരം പ്രദര്‍ശനത്തിനെത്തും.