വാഹനം ഓടിച്ചിരുന്നത് ശ്രീരാം; വേഗത കുറയ്ക്കാന്‍ പറഞ്ഞെങ്കിലും കേട്ടില്ല’ : ശ്രീ റാമിനെ കുടുക്കി വഫയുടെ രഹസ്യ മൊഴി
മാധ്യമ പ്രവര്‍ത്തകനെ കാറിടിച്ചു കൊലപ്പെടുത്തിയ സംഭവത്തില്‍ ഐഎഎ ശ്രീ റാമിനെ കുടുക്കി അപകടസമയത്തുണ്ടായിരുന്ന വഫയുടെ രഹസ്യ മൊഴി പുറത്ത്.
അപകടസമയത്ത് വാഹനം ഓടിച്ചിരുന്നത് ശ്രീറാമായിരുന്നുവെന്നും ശ്രീറാം മദ്യപിച്ചിരുന്നുവെന്നും വഫ മൊഴിയില്‍ പറയുന്നു. അമിതവേഗതയിലായിരുന്നു വാഹനമോടിച്ചതെന്നും മൊഴി നല്‍കിയിട്ടുണ്ട്.
കവടിയാര്‍ സി.സി.ഡിയുടെ മുന്‍പില്‍ വെച്ച് ശ്രീറാം വാഹനമോടിക്കാന്‍ തുടങ്ങി. വേഗത കുറയ്ക്കാന്‍ പറഞ്ഞെങ്കിലും ശ്രീറാം കേട്ടില്ലെന്നും വഫ ഫിറോസിന്റെ രഹസ്യ മൊഴിയില്‍ പറയുന്നു. ഇതോടെ താനല്ല വാഹനം ഓടിച്ചത് എന്നും താന്‍ മദ്യപിച്ചിരുന്നില്ല എന്നുമുള്ള ശ്രീ റാമിന്റെ വാദം പൊളിയുകയാണ്.
അതേസമയം, കേസുമായി ബന്ധപ്പെട്ട് റിമാന്‍ഡിലുള്ള സര്‍വേ ഡയറക്ടര്‍ ശ്രീറാം വെങ്കിട്ടരാമിനെ സസ്പെന്‍ഡ് ചെയ്തിട്ടുണ്ട്. സര്‍വേ ഡയറക്ടര്‍ സ്ഥാനത്ത് നിന്നും ശ്രീറാമിനെ സസ്പെന്‍ഡ് ചെയ്തു കൊണ്ട് ചീഫ് സെക്രട്ടറി ഉത്തരവിറക്കി. മാധ്യമപ്രവര്‍ത്തകന്‍ കെ.എം ബഷീര്‍ കൊല്ലപ്പെട്ട കേസില്‍ ശനിയാഴ്ച വൈകീട്ടാണ് ശ്രീറാം വെങ്കിട്ടരാമനെ റിമാന്‍ഡ് ചെയ്തത്.
