നയന്‍താരയുടെയും വിഘ്‌നേശിന്റെയും തിരുപ്പതി ക്ഷേത്ര ദര്‍ശന ചിത്രങ്ങള്‍ വൈറല്‍
തെന്നിന്ത്യയിലെ ലേഡി സൂപ്പര്‍സ്റ്റാര്‍ എന്നറിയപ്പെടുന്ന നടിയാണ് മലയാളി കൂടിയായ നയന്‍താര. നയന്‍സും തമിഴ് സംവിധായകന്‍ വിഘ്‌നേഷ് ശിവനും പ്രണയത്തിലാണെന്നത് ഏവര്‍ക്കും അറിയാവുന്ന കാര്യമാണ്. ഇരുവരും ഉടന്‍ വിവാഹിതരാകും എന്ന നിലയില്‍ വാര്‍ത്തകള്‍ വരാന്‍ തുടങ്ങിയിട്ട് കാലങ്ങളായി. നയന്‍സുമൊത്തുള്ള യാത്രകളും ആഘോഷങ്ങളുമൊക്കെ മുടങ്ങാതെ വിഘ്‌നേഷ് ഇന്‍സ്റ്റഗ്രാമിലുള്‍പ്പടെ പങ്കുവയ്ക്കാറുമുണ്ട്.
അത്തരത്തില്‍ വിഘ്‌നേശ് ശിവനും നയന്‍താരയും തിരുപ്പതി തിരുമല വെങ്കടേശ്വര ക്ഷേത്ര ദര്‍ശനം നടത്തിയ വീഡിയോയും ചിത്രങ്ങളുമാണ് ഇപ്പോള്‍ സമൂഹ മാധ്യമങ്ങളില്‍ വൈറലാകുന്നത്. തന്റെ പുതിയ ചിത്രമായ ബിഗില്‍ ഇന്ന് റിലീസ് ചെയ്യാനിരിക്കെയാണ് നയന്‍സ് തിരുപ്പതി ദര്‍ശനം നടത്തിയത്. നയന്‍സ് മുഖ്യവേഷത്തില്‍ എത്തിയ നായികാ പ്രാധാന്യം ഉള്ള ചില ചിത്രങ്ങള്‍ അടുത്ത കാലത്തായി പരാജയപ്പെട്ടിരുന്നു. എന്നാല്‍ ബിഗിലിലൂടെ ശക്തമായ തിരിച്ചുവരവിനാണ് താരം ഇപ്പോള്‍ ശ്രമിച്ചിരിക്കുന്നത്.
എ ആര്‍ മുരുഗദോസ് സംവിധാനം ചെയ്യുന്ന രജനികാന്ത് ചിത്രമായ ദര്‍ബാറിലെ നായികയായിട്ടാണ് നയന്‍താര ഏറ്റവും ഒടുവില്‍ അഭിനയിച്ചത്. ചിത്രം അടുത്ത വര്‍ഷം റിലീസ് ചെയ്യും. സൂര്യയും കീര്‍ത്തി സുരേഷും പ്രധാനവേഷത്തിലെത്തിയ ‘താനാ സേര്‍ന്ത കൂട്ടം’, നയന്‍താര-വിജയ് സേതുപതി ജോഡികള്‍ തകര്‍ത്തഭിനയിച്ച സൂപ്പര്‍ഹിറ്റ് ചിത്രം ‘നാനും റൗഡി താന്‍’ തുടങ്ങിയ ചിത്രങ്ങളുടെ സംവിധായകനാണ് വിഘ്‌നേഷ് ശിവന്‍.
