വിദ്യാര്‍ത്ഥികള്‍ക്കെതിരെ യുഎപിഎ ചുമത്തിയ സംഭവം ; വിശദീകരണം നല്‍കി മുഖ്യമന്ത്രി
സി പി ഐ പ്രവര്‍ത്തകരായ വിദ്യാര്‍ഥികളെ യുഎപിഎ ചുമത്തി അറസ്റ്റ് ചെയ്ത സംഭവത്തില്‍ പൊളിറ്റ് ബ്യൂറോയ്ക്ക് വിശദീകരണം നല്‍കി മുഖ്യമന്ത്രി പിണറായി വിജയന്‍. പോലീസ് ആണ് വിദ്യാര്‍ഥികള്‍ക്കെതിരെ യുഎപിഎ ചുമത്തിയതെന്ന് സിപിഎം പൊളിറ്റ് ബ്യൂറോയ്ക്ക് നല്‍കിയ വിശദീകരണത്തില്‍ പിണറായി പറഞ്ഞു. വിഷയം സര്‍ക്കാരിന്റെ പരിഗണനയ്ക്ക് വരുമ്പോള്‍ ഉചിതമായ തീരുമാനം എടുക്കുമെന്നും മുഖ്യമന്ത്രി അറിയിച്ചു.
യുഎപിഎ കരിനിയമമാണെന്നത് പാര്‍ട്ടി നയമാണെന്നും ആ നിലപാടില്‍ മാറ്റമില്ലെന്നും പറഞ്ഞ പിണറായി ഇപ്പോഴത്തെ സാഹചര്യത്തില്‍ പോലീസിന്റെ സ്വതന്ത്രമായി പ്രവര്‍ത്തിക്കാനുള്ള അവകാശത്തില്‍ ഇടപെടില്ലെന്നും വ്യക്തമാക്കി.
അതേസമയം വിദ്യാര്‍ത്ഥികള്‍ക്കെതിരെ യു എപിഎ ചുമത്തിയതില്‍ സംസ്ഥാന സര്‍ക്കാന് പിബിയില്‍ കടുത്ത വിമര്‍ശനം നേരിടേണ്ടി വന്നു. മുഖ്യമന്ത്രി നല്‍കിയ വിശദീകരണം തൃപ്തമല്ലെന്നും ഒരു വിഭാഗം അംഗങ്ങള്‍ നിലപാടെടുത്തു. ആക്ടിവിസ്റ്റുകള്‍ക്ക് കയറാനുള്ള വേദിയല്ല ശബരിമല എന്ന ദേവസ്വം മന്ത്രി കടകംപള്ളിയുടെ പ്രസ്ഥാവനയെയും പിബി വിമര്‍ശിച്ചു.
പാര്‍ലമെന്റിന്റെ അകത്തും പുറത്തും യുഎപിഎ കരിനിയമമാണെന്നാണ് സിപിഐഎം നിലപാട്. സിപിഐഎം ഭരിക്കുന്ന സംസ്ഥാനത്തു തന്നെ യുഎപിഎ ചുമത്തിയത് അനുചിതമായെന്ന് പിബി വിലയിരുത്തി. ഇപ്പോള്‍ സര്‍ക്കാര്‍ വിഷയത്തില്‍ ഇടപെട്ടാല്‍ പൊലീസിന്റെ സ്വതന്ത്ര അധികാരത്തിന്മേലുള്ള കൈകടത്തലാകുമെന്ന് മുഖ്യമന്ത്രി വിശദീകരിച്ചു.
സംസ്ഥാന സര്‍ക്കാറിന്റെ മുന്നില്‍ നിയമപരമായി വിഷയം എത്തുമ്പോള്‍ ഉചിതമായി നടപടി എടുക്കുമെന്നും മുഖ്യമന്ത്രി പിബിയെ അറിയിച്ചു. വിശദീകരണത്തില്‍ ഒരു വിഭാഗം അംഗങ്ങള്‍ അതൃപ്തി പ്രകടിപ്പിച്ചു. തുടര്‍ന്ന് ജനുവരിയില്‍ ചേരുന്ന കേന്ദ്ര കമ്മറ്റിയ്ക്ക് വിഷയം വിട്ടു.
