ഫ്രാന്‍സ് നിശ്ചലം: പ്രതിഷേധം തുടര്‍ന്നേക്കും
പാരിസ്: പെന്‍ഷന്‍ പരിഷ്‌കരണത്തിനെതിരെയുള്ള സമരം ഒരാഴ്ച പിന്നിടുന്നു. റെയില്‍വേ തൊഴിലാളികളും അധ്യാപകരും ആശുപത്രി ജീവനക്കാരുമുള്‍പ്പെടെ എട്ടുലക്ഷത്തോളം പേരാണ് സമരത്തില്‍. കഴിഞ്ഞ 10 വര്‍ഷത്തില്‍ നടക്കുന്ന ഏറ്റവും വലിയ പണിമുടക്കാണിത്. 1995ല്‍ നടന്ന പണിമുടക്കില്‍ രാജ്യം മൂന്നാഴ്ചത്തേക്ക് മരവിച്ചിരുന്നു.
പുതിയ തീരുമാനം ഫലപ്രദമാകാത്ത സാഹചര്യത്തില്‍ പണിമുടക്കുകള്‍ ക്രിസ്മസ് വരെ നീണ്ടുനില്‍ക്കാന്‍ സാധ്യതയുണ്ടെന്നും സൂചനയുണ്ട്. പാരീസില്‍ മാത്രമായി പ്രതിഷേധക്കാരെ നേരിടാന്‍ ആറായിരത്തോളം പോലീസുകാരെ വിന്യസിച്ചിട്ടുണ്ട്. പ്രതിഷേധത്തിനിടെ ചിലര്‍ വലിയ ട്രെയിലറുകള്‍ക്ക് തീയിടുകയും കനത്ത പുകയുടെ മറയില്‍ ഹൈസ്ട്രീറ്റ് സ്റ്റോറുകളില്‍ മോഷണം നടന്നതായും റിപ്പോര്‍ട്ടുകളുണ്ട്.
സര്‍വമേഖലയിലെയും തൊഴിലാളികള്‍ പണിമുടക്കിയതോടെ, രാജ്യമൊന്നാകെ നിശ്ചലമായിരിക്കുകയാണ്. പൊതുഗതാഗതസംവിധാനവും വാര്‍ത്താവിതരണമേഖലയും താറുമാരായിരിക്കുകയാണ്. ഈഫല്‍ ടവര്‍, വാഴ്‌സ കൊട്ടാരം തുടങ്ങി രാജ്യത്തെ പ്രധാന വിനോദസഞ്ചാര കേന്ദ്രങ്ങളും പ്രവര്‍ത്തിക്കുന്നില്ല. സമരത്തെത്തുടര്‍ന്ന് ഫ്രാന്‍സിലെമ്പാടും സ്‌കൂളുകള്‍ അടഞ്ഞുകിടക്കുന്നതായാണ് റിപ്പോര്‍ട്ട്. ബാങ്കുകളുള്‍പ്പെടെയുള്ള പൊതു സ്ഥാപനങ്ങളൊന്നും കാര്യമായി പ്രവര്‍ത്തിക്കുന്നില്ല. പാരീസ് മെട്രോയും തടസപ്പെട്ടു.
42 വ്യത്യസ്ത ഭരണകൂടങ്ങളെ ഒരൊറ്റ ഭരണകൂടത്തില്‍ ലയിപ്പിച്ച് സങ്കീര്‍ണ്ണമായ ഫ്രഞ്ച് റിട്ടയര്‍മെന്റ് സംവിധാനം ലളിതമാക്കാന്‍ ഫ്രഞ്ച് പ്രസിഡന്റ് ഇമ്മാനുവല്‍ മാക്രോണ്‍ മുന്നിട്ടറങ്ങിയതാണ് പ്രശ്‌നങ്ങളുടെ തുടക്കം. ഇത് നിലവിലുള്ള പെന്‍ഷന്‍ പദ്ധതികളെയെല്ലാം തകിടം മറിക്കുമെന്നാണ് ഈ പ്രതിഷേധത്തിന്റെ കാരണം. രാജ്യത്തെ സംസ്ഥാന പെന്‍ഷന്‍ വ്യവസ്ഥയുടെ വിവാദപരമായ പരിഷ്‌കരണത്തിലൂടെ വിരമിക്കലിനായി ഒരു ‘പോയിന്റ് സിസ്റ്റം’ അവതരിപ്പിക്കും. ഇത് വിരമിക്കല്‍ പ്രായത്തെയും വിരമിക്കല്‍ സമയത്ത് ലഭിക്കുന്ന അലവന്‍സിനെയും ഭീഷിണിയിലാക്കുമെന്നും പറയുന്നു.
നിലവില്‍, പൊതുമേഖലാ തൊഴിലാളികളുടെ പെന്‍ഷനുകള്‍ കണക്കാക്കുന്നത് കഴിഞ്ഞ ആറ് മാസത്തെ തൊഴില്‍ സമയത്ത് അവര്‍ നേടിയ ശമ്പളത്തെ അടിസ്ഥാനമാക്കിയാണ്. പുതിയ സംവിധാനം എല്ലാ വര്‍ഷവും കണക്കിലെടുക്കും. ഇതിനര്‍ത്ഥം നിങ്ങള്‍ക്ക് കുറച്ചുകാലം സ്വയംതൊഴിലാളിയായിരുനെങ്കിലോ അല്ലെങ്കില്‍ കുറച്ച് സമയത്തേക്ക് ജോലി ചെയ്യുന്നതില്‍ നിന്ന് നിങ്ങളെ തടയുന്ന ആരോഗ്യപ്രശ്‌നങ്ങളുണ്ടെങ്കിലോ, നിങ്ങള്‍ക്ക് കുറഞ്ഞ പെന്‍ഷന്‍ മാത്രമേ ലഭിക്കുകയുള്ളു.