എക്സൈസ് സംഘത്തെ കണ്ട് ഭയന്നോടിയ യുവാവ് പുഴയില്‍ വീണ് മരിച്ചു
തൃശൂര്‍ കിഴുപ്പിള്ളിക്കരയിലാണ് സംഭവം. തൃപ്രയാര്‍ സ്വദേശി അക്ഷയ് ആണ് മരിച്ചത്. രഹസ്യ വിവരത്തെ തുടര്‍ന്ന് കഞ്ചാവ് വില്‍പന സംഘത്തെ പിടികൂടാനായി പ്രദേശത്ത് എത്തിയ എകസൈസ് സംഘത്തെ കണ്ട് ഒരുകൂട്ടം യുവാക്കള്‍ ചിതറിയോടുകയായിരുന്നു. ഇതിനിടെ അക്ഷയ് പുഴയില്‍ വീഴുകയായിരുന്നു.
എന്നാല്‍ അക്ഷയ് മുങ്ങി മരിക്കുമ്പോള്‍ പ്രദേശവാസികളും എക്സൈസ് ഉദ്യോഗസ്ഥരും രക്ഷിക്കാന്‍ ശ്രമിച്ചില്ലെന്നും വീഡിയോ ചിത്രീകരിക്കുകയായിരുന്നുവെന്നുമുള്ള ആരോപണവും ഉയരുന്നു. യുവാവ് പുഴയില്‍ വീണകാര്യം അറിഞ്ഞിരുന്നില്ലെന്നാണ് എക്സൈസിന്റെ വിശദീകരണം. സംഭവത്തില്‍ അന്തിക്കാട് പൊലീസ് അസ്വഭാവിക മരണത്തിന് കേസെടുത്തു.
അതേസമയം യുവാവിനെ രക്ഷിക്കാതെ നോക്കി നിന്നു എന്നാരോപിച്ച് പ്രദേശവാസിയുടെ വീടും കൃഷിയിടവും ഒരു സംഘം യുവാക്കള്‍ ചേര്‍ന്ന് ആക്രമിച്ചു.
