ബ്ലാസ്റ്റേഴ്‌സിന് തുടര്‍ച്ചയായ രണ്ടാം ജയം
ഐഎസ്എല്ലില്‍ കേരള ബ്ലാസ്റ്റേഴ്‌സിന് തുടര്‍ച്ചയായ രണ്ടാം ജയം. ഇന്ന് കൊല്‍ക്കത്തയില്‍ നടന്ന മത്സരത്തില്‍ ആതിഥേയരായ എടികെയെ ഏകപക്ഷീയമായ ഒരു ഗോളിനു തോല്പിച്ചാണ് ബ്ലാസ്റ്റേഴ്സ് വിജയം തുടര്‍ന്നത്. 70ആം മിനിട്ടില്‍ ഹാലിചരന്‍ നര്‍സാരിയാണ് മത്സരഗതി നിര്‍ണയിച്ച ഗോള്‍ നേടിയത്. ഉദ്ഘാടന മത്സരത്തില്‍ സ്വന്തം തട്ടകത്തില്‍ വെച്ചും ബ്ലാസ്റ്റേഴ്സ് എടികെയെ തോല്പിച്ചിരുന്നു.
എടികെയുടെ കൗണ്ടര്‍ അറ്റാക്കും ബ്ലാസ്റ്റേഴ്‌സിന്റെ പൊസിഷന്‍ ഫുട്‌ബോളും തമ്മിലായിരുന്നു മത്സരം. ആദ്യ പകുതിയില്‍ ആതിഥേയരെ വിഴുങ്ങിക്കളഞ്ഞ പ്രകടനമാണ് ബ്ലാസ്റ്റേഴ്സ് നടത്തിയത്. മികച്ച പൊസിഷനും പാസിംഗ് ആക്യുറസിയും കാഴ്ച വെച്ച മഞ്ഞപ്പട കോച്ചിന്റെ തന്ത്രങ്ങള്‍ കൃത്യമായി കളിക്കളത്തില്‍ നടപ്പാക്കി .ജയത്തോടെ 14 പോയിന്റുമായി ബ്ലാസ്റ്റേഴ്സ് ആറാം സ്ഥാനത്തേക്കുയര്‍ന്നു. കൊല്‍ക്കത്തയില്‍ ഇതുവരെ പരാജയപ്പെട്ടിട്ടില്ലെന്ന എടികെയുടെ റെക്കോര്‍ഡ് കൂടിയാണ് ബ്ലാസ്റ്റേഴ്സ് തകര്‍ത്തത്. 21 പോയിന്റുമായി എടികെ മൂന്നാം സ്ഥാനത്താണ്.
