കളിയിക്കാവിള കൊലപാതകത്തില്‍ നാലുപേര്‍ പിടിയില്‍
കേരളാ തമിഴ് നാട് അതിര്‍ത്തിയായ കളിയിക്കാവിളയില്‍ പൊലീസ് ഉദ്യോഗസ്ഥനെ വെടിവെച്ചുകൊന്ന സംഭവത്തില്‍ നാലുപേര്‍ പോലീസ് കസ്റ്റഡിയില്‍. കൊല്ലം പാലരുവിയില്‍നിന്നാണ് ഇവരെ പിടികൂടിയത്. കസ്റ്റഡിയിലെടുത്തവരെ തെന്‍മല പൊലീസ് തമിഴ്‌നാട് പൊലീസിന് കൈമാറി. കൊലപാതകവുമായി നേരിട്ട് ബന്ധമുള്ളവരാണ് പിടിയിലായതെന്നാണ് സൂചന.
പൊലീസ് ഉദ്യോഗസ്ഥനെ കൊലപ്പെടുത്തിയവര്‍ക്ക് സഹായം ചെയ്തു നല്‍കിയവരാണ് ഇവര്‍. ഇവരെ തമിഴ്‌നാട്ടിലെത്തിച്ചിട്ടുണ്ട്. അവിടുത്തെ ക്യൂബ്രാഞ്ച് ഉദ്യോഗസ്ഥര്‍ ഉള്‍പ്പടെ കസ്റ്റഡിയിലായവരെ ചോദ്യം ചെയ്യും. അക്രമത്തിന് നേതൃത്വം നല്‍കിയവരും കസ്റ്റഡിയിലുണ്ടെന്ന് സൂചനയുണ്ട്. എന്നാല്‍ ഇക്കാര്യം ഇതുവരെ ഔദ്യോഗികമായി സ്ഥിരീകരിക്കപ്പെട്ടിട്ടില്ല.
ഈ മാസം എട്ടാം തീയതി രാത്രിയാണ് കളിയിക്കവിള സ്റ്റേഷനിലെ എസ് എസ് ഐ വിന്‍സന്റി(58)നെ വെടിവെച്ച് കൊലപ്പെടുത്തിയത്. കളിയിക്കാവിളയില്‍ ഔട്ട് പോസ്റ്റ് ഡ്യുട്ടിയില്‍ ആയിരുന്ന വിന്‍സെന്റ് നു നേരെ മുഖം മൂടി ധരിച്ചു ബൈക്കില്‍ എത്തിയ രണ്ടുപേര്‍ നാലുതവണ വെടി വെയ്ക്കുകയായിരുന്നു. ഗുരുതരമായി പരിക്കേറ്റ വിന്‍സെന്റിനെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാന്‍ കഴിഞ്ഞില്ല.
