പള്ളിപ്പുറത്ത് കാപ്പാ കേസ് പ്രതിയെ സഹോദരന്‍ കുത്തിക്കൊന്നു
ആലപ്പുഴ പള്ളിപ്പുറത്ത് കാപ്പാ കേസ് പ്രതിയെ സഹോദരന്‍ കുത്തിക്കൊന്നു . കരുനാട് വീട്ടില്‍ മഹേഷ് ആണ് കൊല്ലപ്പെട്ടത്. സംഭവത്തില്‍ സഹോദരന്‍ ഗിരീഷിനെ ചേര്‍ത്തല പൊലീസ് കസ്റ്റഡിയില്‍ എടുത്തു.
പുലര്‍ച്ചെ രണ്ടു മണിയോടെയാണ് സംഭവം നടന്നത്. ഇന്നലെ വൈകുന്നേരം മുതല്‍ മഹേഷും സഹോദരന്‍ ഗിരീഷും ആയി മദ്യപിച്ച ശേഷം വഴക്ക് ഉണ്ടായിരുന്നു.
അര്‍ദ്ധരാത്രിയോടെ ഗിരീഷിന്റെ വീടിന് മുന്നില്‍ വെച്ച് അടിപിടി ഉണ്ടായി. തുടര്‍ന്നാണ് മഹേഷിനു കുത്തേറ്റത്. അടിവയറ്റില്‍ ആഴ്ത്തില്‍ മുറിവേറ്റ മഹേഷിനെ കൊണ്ട് അച്ഛനും ഗിരീഷും ചേര്‍ത്തലയിലെ ആശുപത്രിയിലേക്ക് പോയി. എന്നാല്‍ ആശുപത്രിയില്‍ എത്തും മുന്‍പേ മരിച്ചു. ഗിരീഷിനെ ആശുപത്രിയില്‍ നിന്നാണ് ചേര്‍ത്തല പോലീസ് കസ്റ്റഡിയിലെടുത്തത്. കൊല്ലപ്പെട്ട മഹേഷ് നിരവധി ക്രിമിനല്‍ കേസുകളില്‍ പ്രതിയായിരുന്നു.
ഏറെനാളായി സഹോദരങ്ങള്‍ തമ്മില്‍ വഴക്കും അടിപിടിയും ഉണ്ടാകാറുണ്ടെന്ന് പ്രദേശവാസികള്‍ പൊലീസിന് മൊഴി നല്‍കി. ഫൊറന്‍സിക് സംഘവും വിരലടയാള വിദഗ്ധരും സ്ഥലത്തെത്തി പരിശോധന നടത്തി. കാപ്പാ കേസില്‍ ശിക്ഷ കഴിഞ്ഞ് അടുത്തിടെയാണ് മഹേഷ് പുറത്തിറങ്ങിയത്. ഭാര്യയും രണ്ട് മക്കളുമുണ്ട്.
