പന്തീരാങ്കാവ് യുഎപിഎ കേസില്‍ യുഡിഎഫ് ഇടപെടുന്നു ; പ്രതിപക്ഷ നേതാവ് പ്രതികളുടെ വീടുകള്‍ സന്ദര്‍ശിക്കും
പന്തീരാങ്കാവില്‍ മാവോയിസ്റ്റ് ബന്ധം ആരോപിച്ചു സി പി എം പ്രവര്‍ത്തകര്‍ അറസ്റ്റിലായ കേസില്‍ യുഡിഎഫ് ഇടപെടുന്നു. വിഷയത്തില്‍ മുന്നണിതലത്തില്‍ ഇടപെടുമെന്ന് മുസ്ലിം ലീഗ് നേതാവ് എംകെ മുനീര്‍ എംഎല്‍എ പറഞ്ഞു. പ്രതികളുടെ വീട് സന്ദര്‍ശിച്ചതിന് ശേഷമാണ് മുനീര്‍ ഇക്കാര്യം വ്യക്തമാക്കിയത്.
കേസില്‍ യുഎപിഎ ചുമത്താനുള്ള കാരണം മുഖ്യമന്ത്രി വിശദീകരിക്കണമെന്നും മുന്നണിയിലെ എല്ലാ പാര്‍ട്ടികളുമായി കൂടി ആലോചിച്ച ശേഷം കൂടുതല്‍ തീരുമാനങ്ങളുണ്ടാകുമെന്നും അദ്ദേഹം വ്യക്തമാക്കി.
അതുപോലെ നാളെ പ്രതിപക്ഷ നേതാവ് രമേശ് ചെന്നിത്തല പ്രതികളായ അലന്റെയും താഹയുടെയും വീടുകള്‍ സന്ദര്‍ശിക്കും. വിവാദമായ കേസില്‍ സിപിഐഎം പ്രവര്‍ത്തകരായ പ്രതികളെ പാര്‍ട്ടി തള്ളിപ്പറഞ്ഞ സാഹചര്യത്തിലാണ് എതിര്‍പക്ഷത്ത് നിന്നൊരു ഇടപെടല്‍.
നേരത്തെ സിപിഐഎമ്മിനും മുഖ്യമന്ത്രി പിണറായി വിജയനും എതിരെ അലനും താഹയും രംഗത്ത് എത്തിയിരുന്നു. തങ്ങള്‍ കുറ്റം ചെയ്തതായി തെളിവ് ഉണ്ടെങ്കില്‍ മുഖ്യമന്ത്രി അത് പുറത്തു വിടണം എന്നാണ് ഇരുവരും പറഞ്ഞത്. കഴിഞ്ഞ ഇലക്ഷന് പാര്‍ട്ടിക്ക് വേണ്ടി രാപകല്‍ പ്രവര്‍ത്തിച്ച തങ്ങളെ അകാരണമായിട്ടാണ് അറസ്റ്റ് ചെയ്തത് എന്നും ഇരുവരും പറഞ്ഞു.
