ശരണ്യ പ്ലാന്‍ ചെയ്തത് ഭര്‍ത്താവിനെയും കുഞ്ഞിനേയും ഒരുമിച്ച് ഒഴിവാക്കി കാമുകന്റെ കൂടെ പോകാന്‍
കുഞ്ഞിനെ കൊലപ്പെടുത്തിയ ശേഷം കുറ്റം ഭര്‍ത്താവിന്റെ തലയില്‍ കെട്ടിവെച്ചു അയ്യാളെ ജയിലില്‍ ആക്കിയതിന് ശേഷം ശിഷ്ട്ടകാലം കാമുകന്റെ കൂടെ സസുഖം വാഴാന്‍ ആയിരുന്നു ശരണ്യയുടെ പ്ലാന്‍. അതിനു വേണ്ടി പ്രഫഷണല്‍ കുറ്റവാളികള്‍ ചെയ്യുന്നത് പോലെയുള്ള ഗൂഢാലോചനയാണ് ശരണ്യ നടത്തിയത്. തനിക്ക് ഒറ്റയ്ക്ക് ജീവിക്കാന്‍ വേണ്ടിയാണ് കുഞ്ഞിനെ കൊലപ്പെടുത്തിയത് എന്നാണ് ശരണ്യ ആദ്യം പൊലീസിനോട് പറഞ്ഞത്. എന്നാല്‍ ഭര്‍ത്താവിനെ ഉപേക്ഷിച്ച് കാമുകനൊപ്പം പോകാന്‍ ശരണ്യ പദ്ധതിയിട്ടിരുന്നതായി അന്വേഷണ സംഘം കണ്ടെത്തുകയായിരുന്നു. ഒരു പ്രണയവിവാഹത്തിന്റെ ദുരന്തപൂര്‍ണമായ പര്യവസാനത്തിനാണ് കണ്ണൂര്‍ തയ്യില്‍ കടപ്പുറം നിവാസികള്‍ ഇന്ന് സാക്ഷിയായത്.
തിങ്കളാഴ്ച രാവിലെ മൂന്ന് മണിയോടു കൂടിയാണ് ശരണ്യ കുഞ്ഞിനെ കൊലപ്പെടുത്തിയത്. മത്സ്യ തൊഴിലാളിയായ അച്ഛന്‍ വത്സരാജ് കടലില്‍ ജോലിക്ക് പോയ ദിവസം അകന്നുകഴിയുന്ന ഭര്‍ത്താവ് പ്രണവിനെ ശരണ്യ വിളിച്ചുവരുത്തുകയായിരുന്നു. കഴിഞ്ഞ ഞായറാഴ്ച രാത്രി അവര്‍ ശരണ്യയുടെ വീട്ടില്‍ ഒരുമിച്ച് താമസിച്ചു. ഭാര്യയുടെ മനംമാറ്റത്തില്‍ സന്തോഷിച്ചു കിടന്നുറങ്ങിയ പ്രണവ് ഇത് തന്നെ കുടുക്കുവാനുള്ള കെണിയാണ് എന്ന് അറിഞ്ഞിരുന്നില്ല.
തിങ്കളാഴ്ച പുലര്‍ച്ചെ മൂന്നു മണിയോടെ ശരണ്യ എഴുന്നേറ്റു. പ്രണവിനൊപ്പം കിടന്നുറങ്ങുകയായിരുന്നു ഒന്നരവയസുകാരന്‍ വിയാന്‍. പതുക്കെ എടുത്തപ്പോള്‍ കുഞ്ഞ് കരഞ്ഞു. അപ്പോള്‍ പാലു കൊടുത്ത് ശാന്തനാക്കി. പിന്നീട് കുഞ്ഞുമായി കടല്‍ക്കരയിലേക്ക് നീങ്ങി, എന്നിട്ട് കടലിലേക്ക് വലിച്ചെറിഞ്ഞു. കടല്‍ ഭിത്തിയിലെ പാറകളില്‍ വീണ് പരിക്കേറ്റ കുട്ടി കരഞ്ഞു നിലവിളിച്ചു. ശബ്ദം നാട്ടുകാരെ ഉണര്‍ത്തും എന്ന് മനസ്സിലാക്കിയ ശരണ്യ വീണ്ടും ഇറങ്ങി ചെന്ന് കുട്ടിയെ എടുത്ത് ഒന്നുകൂടി കടലിലേക്ക് എറിഞ്ഞു.
വീട്ടിലേക്ക് മടങ്ങിയ ശരണ്യ ഒന്നും അറിയാത്ത പോലെ കിടന്നുറങ്ങി. രാവിലെ സാധാരണഗതിയില്‍ എന്നപോലെ എഴുന്നേറ്റ് കുട്ടിയെ കാണാനില്ലെന്ന് മുറവിളികൂട്ടി. പൊലീസും നാട്ടുകാരും നടത്തിയ തിരച്ചിലില്‍ കുട്ടിയുടെ മൃതദേഹം കടല്‍ഭിത്തിയില്‍ കണ്ടെത്തി. ഇതിനിടയില്‍ വിയാനെ കൊന്നത് പ്രണവ് ആണെന്ന് എല്ലാവരും സംശയിച്ചു. മകന്റെ മരണത്തില്‍ നല്ലത് പോലെ തന്നെ ശരണ്യ അഭിനയം നടിച്ചു കരഞ്ഞു വിളിച്ചു നാട്ടുകാരുടെ മുന്നില്‍ നല്ലവള്‍ ചമഞ്ഞു.
എന്നാല്‍ കണ്ണൂര്‍ ഡിവൈഎസ്പി പി പി സദാനന്ദനും സിറ്റി സ്റ്റേഷനില്‍ സി ഐ പിആര്‍ സതീശനും ശരണ്യയെ പൂര്‍ണമായി വിശ്വസിച്ചില്ല. ശരണ്യയുടെ രീതികളില്‍ സംശയം തോന്നിയ അവര്‍ അവര്‍ ശരണ്യയുടെ ഉള്‍പ്പെടെയുള്ള വസ്ത്രങ്ങള്‍ ഫോറന്‍സിക് പരിശോധനയ്ക്ക് അയച്ചു. പരിശോധനയില്‍ കടലിലേക്ക് പോയത് ശരണ്യ ആണെന്ന് തെളിഞ്ഞു.
ഭര്‍ത്താവ് പ്രണവിന്റെ സുഹൃത്ത് നിതിനുമായി ശരണ്യ അടുപ്പത്തിലായിരുന്നു. പ്രണവ് വിദേശത്ത് ജോലി ചെയ്യുന്ന സമയത്തായിരുന്നു അടുപ്പം തുടങ്ങിയത്. അവര്‍ ഒന്നിച്ചു ജീവിക്കാന്‍ ആഗ്രഹിച്ചു. അതോടെ പ്രണവുമായി മനപ്പൂര്‍വം ശരണ്യ പ്രശ്‌നങ്ങള്‍ ഉണ്ടാക്കി. സ്വന്തം വീട്ടില്‍ വന്നു നിന്നു. പല തവണ പ്രണവ് പ്രശ്‌നങ്ങള്‍ പരിഹരിക്കാന്‍ ശ്രമിച്ചു എങ്കിലും ശരണ്യ എങ്ങനെയെങ്കിലും ഭര്‍ത്താവിനെ ഒഴിവാക്കാന്‍ വേണ്ടിയുള്ള ശ്രമത്തിലായിരുന്നു. എന്ത് ചെയ്താലും പ്രണവ് ഒഴിഞ്ഞു പോകില്ല എന്ന് മനസിലാക്കിയ ശരണ്യ അവസാനം കുഞ്ഞിനെ കൊന്നു ആ കുറ്റം അയ്യാളുടെ തലയില്‍ വെക്കാന്‍ ശ്രമിക്കുകയായിരുന്നു.
കുട്ടി ഇല്ലാതെ ചെന്നാല്‍ മാത്രമേ സ്വീകരിക്കാന്‍ കഴിയു എന്ന് കാമുകന്‍ പറഞ്ഞതോടെയാണ് കുട്ടിയെയും ഭര്‍ത്താവിനെയും ഒരുമിച്ച് ഒഴിവാക്കാന്‍ ശരണ്യ പദ്ധതി ഇട്ടത്. എന്നാല്‍ ശരണ്യയുടെ പദ്ധതി പക്ഷേ വിജയിച്ചില്ല. പ്രണവിന്റെ തലയില്‍ കൊല കുറ്റം കെട്ടിവെക്കാന്‍ ശരണ്യ മൊഴി നല്‍കിയെങ്കിലും പൊലീസ് അതെല്ലാം ആഴത്തില്‍ പരിശോധിച്ചു. തെളിവുകളെല്ലാം ശരണ്യയ്ക്ക് എതിരായി. ഒടുവില്‍ പൂര്‍ണമായും കുടുങ്ങി എന്ന് വ്യക്തമായ ശരണ്യ കുറ്റം ഏറ്റുപറഞ്ഞു. അതേസമയം കാമുകന്‍ നിതിന്റെ പങ്കും പോലീസ് പരിശോധിക്കുന്നുണ്ട്. പിടിയിലായി എങ്കിലും കാമുകനെ സംരക്ഷിക്കാന്‍ ആണ് ശരണ്യ അവസാനം വരെ ശ്രമിച്ചത് എന്ന് പോലീസ് പറയുന്നു.
