ജമന്തി എന്ന പേരില്‍ വീട്ടുമുറ്റത്ത് കഞ്ചാവ് വളര്‍ത്തിയ യുവാവ് അറസ്റ്റില്‍
ആലപ്പുഴ തുറവൂരില്‍ ആണ് സംഭവം. വീട്ടുമുറ്റത്ത് കഞ്ചാവ് നട്ടുവളര്‍ത്തിയ യുവാവ് ആണ് പിടിയിലായത്. കുത്തിയതോട് പഞ്ചായത്ത് പത്താം വാര്‍ഡില്‍ ചാലാപ്പള്ളി വീട്ടില്‍ ഷാരൂണിനെയാണ് (24) അറസ്റ്റ് ചെയ്തത്.ജീവിതത്തില്‍ ഇതുവരെ ഒരു ചെടി പോലും നട്ടുവളര്‍ത്താത്ത ഷാരൂണ്‍ പ്ലാസ്റ്റിക് ചാക്കിനകത്ത് നട്ട ചെടിക്ക് പതിവായി വെള്ളമൊഴിക്കുന്നത് കണ്ട് അമ്മ ഏത് ചെടിയാണെന്ന് ചോദിച്ചിരുന്നു.
ജമന്തി പോലൊരു ചെടിയാണെന്നാണ് അന്ന് അമ്മയോട് പറഞ്ഞത്. പിന്നീട് ഷാരൂണ്‍ കഞ്ചാവ് നട്ടുവളര്‍ത്തുന്ന വിവരം വാര്‍ഡില്‍ ജനമൈത്രി ബീറ്റ് നടത്തിയിരുന്ന കുത്തിയതോട് പൊലീസ് സ്റ്റേഷനില്‍ ലഭിച്ചു. സിവില്‍ പൊലീസ് ഓഫീസര്‍മാരായ കെ ആര്‍ രതീഷിനും പ്രവീണിനുമാണ് വിവരം ലഭിച്ചത്. മേലുദ്യോഗസ്ഥരുടെ നിര്‍ദേശപ്രകാരം പിന്നീട് ഉദ്യോഗസ്ഥര്‍ ഷാരൂണിനെ നിരീക്ഷിച്ചു.
കഞ്ചാവ് ചെടികളെ പരിപാലിക്കുന്ന സമയത്ത് കുത്തിയതോട് എസ് ഐ ഏലിയാസ് ജോര്‍ജിന്റെ നേതൃത്വത്തില്‍ പൊലീസ് ഉദ്യോസ്ഥരെത്തി ഷാരൂണിനെ അറസ്റ്റ് ചെയ്യുകയായിരുന്നു. പൊലീസുകാര്‍ നടത്തിയ ചോദ്യംചെയ്യലില്‍ ഷാരൂണിന്റെ അടുക്കല്‍ നിന്ന് കഞ്ചാവ് ഉപയോഗിക്കുന്നവരുടെയും വിതരണം ചെയ്യുന്നവരുടെയും വിവരങ്ങള്‍ ലഭിച്ചിട്ടുണ്ട്.
