മെയ് നാലിന് ബുക്കിംഗ് പുനഃരാരംഭിക്കുമെന്ന് എയര്‍ ഇന്ത്യ
മെയ് മൂന്നിന് കൊറോണ വ്യാപനത്തെ തുടര്‍ന്ന് രാജ്യത്ത് പ്രഖ്യാപിച്ചിരിക്കുന്ന ലോക്ക്ഡൗണ്‍ അവസാനിക്കുന്ന മുറയ്ക്ക് മെയ് നാല് മുതല്‍ ആഭ്യന്തരയാത്രകള്‍ക്കുള്ള ബുക്കിംഗ് ആരംഭിക്കുമെന്ന് എയര്‍ ഇന്ത്യ.
അതേസമയം തിരഞ്ഞെടുക്കപ്പെട്ട ആഭ്യന്തരറൂട്ടുകളിലേക്ക് മാത്രമായിരിക്കും ബുക്കിംഗ്. രാജ്യത്തെ പ്രധാന മെട്രോ നഗരങ്ങളായ മുംബൈ, ഡല്‍ഹി, കൊല്‍ക്കത്ത, ചെന്നൈ, ബംഗളൂരു എന്നിവിടങ്ങളിലേക്ക് ഉള്‍പ്പെടെ ആയിരിക്കും ആഭ്യന്തരയാത്രകള്‍ക്കുള്ള ബുക്കിംഗ് അനുവദിക്കുക.
അതേസമയം, അന്താരാഷ്ട്ര യാത്രകള്‍ക്കുള്ള ബുക്കിംഗ് ജൂണ്‍ ഒന്നിന് മാത്രമേ ആരംഭിക്കുകയുള്ളൂ. കോവിഡ് 19 വ്യാപനത്തെ തുടര്‍ന്ന് പ്രധാനമന്ത്രി നരേന്ദ്ര മോദി പ്രഖ്യാപിച്ച ലോക്ക്ഡൗണ്‍ മാര്‍ച്ച് 25ന് ആരംഭിച്ചതിനെ തുടര്‍ന്നാണ് ആഭ്യന്തര, അന്താരാഷ്ട്ര വിമാന സര്‍വീസുകള്‍ റദ്ദു ചെയ്തത്.
